بشریٰ بی بی تھانہ کوہسار میں درج مقدمے میں جے آئی ٹی کے سامنے پیش

بشریٰ بی بی تھانہ کوہسار میں درج مقدمے میں تفتیش کے لیے ڈی آئی جی اسلام آباد کے دفتر میں پیش ہوئیں۔ بشریٰ بی بی نے تفتیشی ٹیم کے سامنے اپنا بیان قلم بند کرایا۔

انہیں سیشن عدالت نے آج ڈی آئی جی آفس میں شامل تفتیش ہونے کی ہدایت کی تھی جس پر بشریٰ بی بی توشہ خانہ کیس میں دکان کی جعلی رسید بنانے کے تھانہ کوہسار میں درج مقدمہ میں اپنا بیان ریکارڈ کرایا۔ جے آئی ٹی نے مقدمہ 422/23  میں بشریٰ بی بی سے تحقیقات کے لیے سوالات کیے۔

بشریٰ بی بی اپنی لیگل ٹیم کے ہمراہ تقریباً پچاس منٹ تک جے آئی ٹی کے سامنے شامل تفتیش رہیں جس کے بعد وہ واپس روانہ ہوگئیں، جے آئی ٹی نے بشریٰ بی بی سے 20 کے قریب سوالات کئے۔

اس سے قبل بشریٰ بی بی نے چیئرمین پی ٹی آئی عمران خان سے اٹک جیل میں دو گھنٹے طویل ملاقات کی جس کے بعد وہ اسلام آباد آکر توشہ خانہ کیس کی تفتیش کرنے والی جے آئی ٹی کے سامنے پیش ہوگئیں۔

ملاقات کے بعد وہ اٹک جیل سے ڈی آئی جی آفس اپنی قانونی ٹیم کے ساتھ اسلام آباد پہنچیں جہاں توشہ خانہ کیس کی تفتیش کرنے والی جے آئی ٹی کے سامنے پیش ہوئیں۔