سکیورٹی فورسزکاشمالی وزیرستان میں آپریشن، دو دہشت گردہلاک

راوالپنڈی: سیکیورٹی فورسز نے منگل کو شمالی وزیرستان کے علاقے رزمک میں دہشت گردوں کی موجودگی کی اطلاع پر آپریشن کیا اور شدید فائرنگ کے تبادلے میں دو دہشت گردوں کو ہلاک کردیا۔

آئی ایس پی آر کے مطابق انٹیلی جنس بیسڈ آپریشن کے دوران 14اور 15 اگست کی درمیانی شب فورسز نے دہشت گردوں کے ٹھکانے کو نشانہ بنایا اور شدید فائرنگ کے تبادلے کے بعد دودہشت گردوں کو ہلاک کردیا۔فورسز نے مارے گئے دہشت گردوں سے اسلحہ اور گولہ بارود بھی برآمد کرلیا، دہشت گرد بھتہ خوری اور معصوم شہریوں کی ٹارگٹ کلنگ سمیت دہشت گردی کے دیگر جرائم میں بھی سرگرم تھے۔

آئی ایس پی آر کے مطابق علاقے میں پائے جانے والے دیگر دہشت گردوں کو ختم کرنے کے لیے علاقے میں آپریشن جاری ہے۔ علاقہ مکینوں نے آپریشن کو سراہا اور دہشت گردی کی لعنت کے خاتمے کے لیے سیکیورٹی فورسز کوبھرپور تعاون کایقین دلایا۔