امریکہ پاکستان کے عبوری وزیر اعظم اور ان کی ٹیم کے ساتھ مل کر کام کرنے کا منتظر ہے، امریکی محکمہ خارجہ

واشنگٹن: امریکی محکمہ خارجہ کے نائب ترجمان ویدانت پٹیل نےکہا ہےکہ امریکہ نے سینیٹر انوار الحق کاکڑ کی پاکستان کے عبوری وزیر اعظم کے طور پر تقرری کو نوٹ کرتے ہوئے آزادانہ اور منصفانہ انتخابات کے انعقاد سمیت باہمی دلچسپی کے شعبوں میں اپنی حمایت کا اعادہ کیا ہے۔

منگل کو اپنی روزانہ کی پریس بریفنگ میں ایک نجی پاکستانی ٹیلی ویژن چینل کے نمائندے کے سوال کے جواب میں ترجمان نے کہا کہ امریکہ عبوری وزیر اعظم اور ان کی ٹیم کے ساتھ مل کر کام کرنے کا منتظر ہے۔ انہوں نے کہا کہ یقیناً، ہم پاکستان کے ساتھ باہمی دلچسپی کے شعبوں میں شراکت داری جاری رکھیں گے،

جس میں پاکستان کے معاشی استحکام، خوشحالی اور سلامتی میں ہماری دلچسپی، آزادانہ اور منصفانہ انتخابات کا انعقاد اور جمہوریت اور قانون کی حکمرانی کا احترام شامل ہے۔انوار الحق کاکڑ کاکڑ نے پیر کو ایک نگراں حکومت کی سربراہی کے لیے وزیر اعظم کی حیثیت سے حلف اٹھایا جو اقتصادی میدان میں ملک کے سب سے مشکل دور میں پارلیمانی انتخابات کی نگرانی کریں گے۔