نگراں کابینہ آج شام 5 بجے حلف اٹھائے گی

اسلام آباد: نگراں کابینہ کی حلف برداری کا شیڈول جاری کردیا گیا جس کے مطابق تقریب آج (جمعرات) شام 5 بجے ایوان صدر اسلام آباد میں ہوگی۔

تفصیلات کے مطابق صدر مملکت ڈاکٹر عارف علوی نگراں کابینہ سے حلف لیں گے۔ تقریب حلف برداری میں اہم شخصیات شرکت کریں گی جس میں سرفراز بگٹی سمیت کابینہ کے دیگر ارکان حلف اٹھائیں گے۔

وزیراعظم انوار الحق کاکڑ کی نگراں وفاقی کابینہ کے ممکنہ نام سامنے آگئے ہیں۔

اطلاعات کے مطابق نگراں وفاقی کابینہ کی تشکیل کے لیے مختلف ناموں پر غور کیا جا رہا ہے جس میں انیق احمد کو نگراں وزارت مذہبی امور کا قلمدان سونپے جانے کا امکان ہے۔

محمد علی کو نگراں وزیر اطلاعات بنائے جانے کا امکان ہے جب کہ سرفراز بگٹی نگراں وزیر داخلہ کے لیے مضبوط امیدوار ہیں۔ نگراں وزیر خزانہ کے لیے شمشاد اختر اور وقار مسعود کے ناموں پر غور کیا جا رہا ہے۔

اس کے علاوہ گوہر اعجاز کو نگراں وزیر تجارت کا عہدہ سونپے جانے کا امکان ہے جب کہ تابش گوہر، ڈاکٹر عمر سیف، جلیل عباس جیلانی بھی نگراں کابینہ کا حصہ ہوں گے۔