پی آئی اے کی نجکاری کے خلاف ملازمین کا علامتی ہڑتال کا اعلان

پاکستان انٹرنیشنل ایئرلائنز (پی آئی اے) کے ملازمین نے ادارے کی نجکاری کے حکومتی اقدام کے خلاف علامتی ہڑتال کا اعلان کرتے ہوئے کہا ہے کہ اگر ان کے مطالبات تسلیم نہ کیے گئے تو مکمل ہڑتال کی جائے گی۔

گذشتہ ہفتے وزیر اعظم شہباز شریف کی سبکدوش ہونے والی حکومت نے کہا کہ اس نے خسارے کا شکار پی آئی اے کی نجکاری کا منصوبہ بنایا ہے کیونکہ پاکستان کی قومی ایئرلائن پر سینکڑوں ارب روپے خسارے اور بقایا جات کی مد میں واجب الادا ہیں۔

حکومت کا پی آئی اے کی نج کاری کا اقدام بین الاقوامی مالیاتی فنڈ (آئی ایم ایف) کے معاہدے کے مطابق ہو گا جسے پاکستان نے رواں سال جون میں حاصل کیا تھا۔ جنوبی ایشیائی ملک نے مالیاتی نظم و ضبط کے منصوبوں پر اتفاق کیا جس میں خسارے کا شکار اداروں کی نجکاری بھی شامل تھی۔

قومی ائیر لائن کی سی بی اے پیپلز یونٹی یونین کے صدر ہدایت اللہ کا کہنا ہے کہ ہم نے پی آئی اے کی نجکاری اور ملازمین کی تنخواہوں میں اضافہ نہ کرنے کے خلاف علامتی ہڑتال کا اعلان کیا ہے کیونکہ حکومت نے دیگر تمام محکموں کی تنخواہوں میں اضافہ کیا ہے لیکن پی آئی اے ملازمین کے لیے ایسا نہیں کیا۔

انہوں نے مزید کہا اس بات نے ہمیں پاکستان بھر میں پی آئی اے کے بکنگ دفاتر پر سہ پہر 3 سے شام 5 بجے تک علامتی ہڑتال شروع کرنے پر مجبور کیا ہے۔ اس کے بعد ہم اگلے لائحہ عمل کا اعلان کریں گے،  اگر ملازمین کے مطالبات تسلیم نہ کیے گئے تو وہ آخری حربے کے طور پر مکمل ہڑتال کی طرف جائیں گے۔

انہوں نے مزید کہا کہ اس سے پہلے ہم پرامید ہیں کہ حکومت ہمارے مطالبات پر توجہ دے گی، پی آئی اے کی نجکاری کو روکے گی اور ہماری تنخواہوں میں مناسب اضافہ نافذ کرے گی، اگر نگران حکومت پی آئی اے کی نجکاری کو واپس نہیں لے سکتی تو کم از کم اس عمل کو نئی حکومت کے اقتدار سنبھالنے تک روک سکتی ہے۔