90 روز میں الیکشن کی بجائے پہلے نئی حلقہ بندیاں کرائی جائیں گی،الیکشن کمیشن

الیکشن کمیشن کا 90 روز میں الیکنش کی بجائے پہلے نئی حلقہ بندیاں کرانے کا فیصلہ کیا ہے۔

نئی حلقہ بندیوں سے متعلق الیکشن کمیشن کا اجلاس چیف الیکشن کمشنر کی زیر صدارت ہوا جس میں ممبران و سیکریٹری کمیشن سمیت دیگر حکام نے شرکت کی۔

الیکشن کمیشن نے فیصلہ کیا ہے کہ عام انتخابات کےلئے نئی حلقہ بندیاں کی جائے گی، قومی اور صوبائی حلقوں کی از سر نو حلقہ بندیاں ہوں گی۔21 اگست کو چاروں صوبوں اور اسلام آباد کےلئے کمیٹیاں تشکیل دی جائے گی۔ نئی حلقہ بندیوں کو 14 دسمبر تک حتمی شکل دی جائے گی۔

الیکشن کمیشن نے ملک بھر میں نئی مردم شماری کی بنیاد پر حلقہ بندیاں کرنےکا فیصلہ کیا ہے اور حلقہ بندیوں کے لیے 4 ماہ کا وقت مختص کردیا ہے۔ الیکشن کمیشن 10 نومبر سے 9 دسمبر تک حلقہ بندیوں پر اعتراضات پر فیصلےکرےگا۔

الیکشن کمیشن کا  کہنا ہےکہ عام انتخابات 90 دن میں نہیں ہو سکتے، ملک بھر میں8 ستمبر سے7 اکتوبر تک حلقہ بندیاں کی جائیں گی، اکتوبر سے 8 نومبر تک حلقہ بندیوں سے متعلق تجاویز  دی جائیں گی، 5 ستمبرسے7 ستمبر تک  قومی وصوبائی اسمبلیوں کا حلقہ بندیوں کا کوٹہ مختص کیا جائےگا،  حلقہ بندیوں سےمتعلق انتظامی امور  31 اگست تک مکمل کیے جائیں گے۔

الیکشن کمیشن کا کہنا ہےکہ  نئی حلقہ بندیوں کو 14 دسمبر تک حتمی شکل دی جائے گی،14 دسمبر تک حلقہ بندیاں مکمل کرنےکے بعد الیکشن کمیشن انتخابی شیڈول کا اعلان کرےگا۔

الیکشن کمیشن کا موقف ہےکہ ڈیجیٹل مردم شماری کی حتمی اشاعت کردی گئی ہے، الیکشن ایکٹ کے مطابق الیکشن کمیشن نئی حلقہ بندیاں کرنےکا پابند ہے۔