سپریم کورٹ نے آکسیجن سلنڈرز کی قیمت مقرر کرنے کا حکم دے دیا

تفصیلات کے مطابق  سپریم کورٹ میں کورونا وائرس از خود نوٹس کیس کی سماعت ہوئی ، چیف جسٹس گلزار احمد کی سربراہی میں پانچ رکنی بینچ نے سماعت کی، سماعت کے دوران ڈریپ کے نمائندے اور متعلقہ حکام عدالت میں پیش ہوئے۔دوران سماعت ڈریپ کا موقف سننے کے بعد سپریم کورٹ نے آکسیجن سلنڈرز کی قیمت مقرر کرنے کا حکم دیا اور کہا کہ وزارت صنعت و پیداوار دو دن میں آکسیجن سلنڈر کی قیمت کا تعین کرےاور قیمت کے تعین کا طریقہ کار بھی وضع کیا جائے۔

سپریم کورٹ نے آکسیجن سلنڈر کی قیمت مقرر کرنے کا حکم کے پی حکومت کی درخواست پرجاری کیا، دوران سماعت ایڈیشنل اٹارنی جنرل کے پی نے عدالت  کو آگاہ کیا کہ قیمت مقرر نہ ہونے پرسپلائرز من مانے ریٹ وصول کر رہے ہیں۔سربراہ ڈریپ نے سپریم کورٹ کو بتایا کہ کہ آکسیجن وزارت صنعت کے ماتحت ہے ہمارا اس سے تعلق نہیں ہے ۔

دوران سماعت سی ای او ڈریپ نے عدالت کو بتایا کہ وینٹی لیٹرز سمیت کئی آلات ملک میں تیار ہو رہے ہیں۔ ملک میں کورونا سے متعلق کسی بھی دوائی کی قلت نہیں۔ ایکٹمرا انجیکشن کے علاوہ کئی ادویات کا کئی ماہ کا سٹاک موجود ہے۔ جسٹس مظہر عالم میاں خیل نے ریمارکس دیئے کہ ایکٹمرا کے حوالے سے کافی منفی رپورٹس ہیں۔چیف جسٹس گلزاراحمد نے کہا این ڈی ایم اے کے سارے معاملات میں گڑ بڑ ہے۔ عدالت نے این ڈی ایم اے کی کارکردگی پر عدم اعتماد کا اظہار کرتے ہوئے این ڈی ایم او کو طلب کرلیا گیا ہے۔

 چیف جسٹس نے ریمارکس دیئے کہ پاکستان اسٹیل مل سے آکسیجن کی بڑی مقدار مل سکتی ہے۔ جس پر ایڈیشنل اٹارنی جنرل نے جواب دیا کہ اسٹیل مل کا آکسیجن پلانٹ کم و بیش 40 سال پرانا ہے، آکسیجن پلانٹ فعال کرنے میں ایک ارب روپے کی لاگت آئے گی، عدالت کو آکسیجن کے حوالے سے تفصیلی رپورٹ فراہم کریں گے۔