سائفر کیس، شاہ محمود قریشی کا مزید تین روزہ جسمانی ریمانڈ منظور

سائفر کیس میں سابق وزیر خارجہ شاہ محمود قریشی کا مزید تین روزہ جسمانی ریمانڈ منظور کر لیا گیا۔

شاہ محمود قریشی کو  آفیشل سیکریٹ ایکٹ کی خصوصی کی عدالت میں پیش کیا گیا جہاں ان کا جسمانی ریمانڈ منظور کرکے انہیں ایم آئی اے کے حوالے کر دیا گیا۔

شاہ محمود قریشی کو چار روزہ جسمانی ریمانڈ مکمل ہونے کے بعد اسلام آباد میں قائم آفیشل سیکریٹ ایکٹ کے تحت قائم کی گئی خصوصی عدالت میں پیش کیا گیا۔

سائفر کیس کی سماعت میں ایف آئی اے نے شاہ محمود قریشی کے 9 روزہ  جسمانی ریمانڈ کی استدعا کی جس پر عدالت نے فریقین کے دلائل سننے کے بعد فیصلہ محفوظ کیا اور بعد ازاں سابق وزیر خارجہ کا مزید تین روزہ جسمانی ریمانڈ منظور کرلیا۔

واضح رہے کہ شاہ محمود قریشی کو 19 اگست کو ایف آئی اے نے سائفر کیس میں اسلام آباد سے گرفتار کیا تھا، اور انہیں گرفتاری کے بعد ایف آئی اے ہیڈ کوارٹر منتقل کیا گیا تھا۔ گرفتاری کے بعد اسلام آباد کی ماتحت عدالت نے شاہ محمود کا ایک روزہ جسمانی ریمانڈ منظور کرکے ایف آئی اے کے حوالے کیا تھا۔