عمران خان فوج کے خلاف انقلاب لانا چاہتے تھے ،پرویزخٹک کا بڑا لزام

پشاور میں پی ٹی آئی پارلیمنٹیرین کے وائس چیئرمین محمود خان کے ہمراہ صحافیوں سے ملاقات میں  پرویز خٹک کا کہنا تھا کہ  الیکشن کے لیے جنرل (ر) فیض حمید اور قمر جاوید باجوہ نے ماحول بنایا لیکن عمران خان نہیں مانے، جنرل (ر) باجوہ  نےکہا کہ شہباز شریف  لکھ کر دیں گےکہ اسمبلی تحلیل ہوگی، انہوں نے عمران خان کو کہا کہ دھرنا ختم کرو لیکن چیئرمین پی ٹی آئی نہیں مانے۔

سابق وزیر دفاع پرویز خٹک نے کہا کہ سابق آرمی چیف جنرل (ر)قمر جاوید  باجوہ نے پی ٹی آئی کا  بہت ساتھ دیا تھا لیکن انہوں نے بھی آخر میں ہاتھ کھڑے کردیےتھے  اورکہا کہ میں اور کیا کروں میں اب کچھ  نہیں کرسکتا،عمران خان 18 ویں  ترمیم کے خلاف تھے، حکومت تو صرف اعظم خان ہی چلاتے تھے باقی مدد کرتے تھے۔

سابق وزیر دفاع کا کہنا تھا کہ عمران خان فوج کے خلاف اپنا بیانیہ کھڑا کر کے فوج کے خلاف  انقلاب لانا چاہتے تھے، پی ٹی آئی ایک مجرم پارٹی ثابت ہوسکتی ہے جس پر پابندی لگ سکتی ہے۔

انہوں نے مزید کہا کہ پی ٹی آئی کا ایک سوشل میڈیا نیٹ ورک ہےاس کے علاوہ کچھ نہیں ہے ، سوشل میڈیا نیٹ ورک کے ذریعے لوگوں کے خلاف ٹارگٹ دیا جاتا ہے، پی ٹی آئی پختونخوا کے اہم رہنما جلد پارلیمنٹرین کا حصہ ہوں گے، 2 ماہ میں پارٹی ایک طاقت بن کر ابھرے گی۔