قطر کے وزیر خزانہ ، فراڈ کے الزام میں گرفتار

غیر ملکی خبر رساں ادارے کے مطابق  قطر کے وزیرخزانہ  علی شریف العمادی کو فراڈ کے الزام میں گرفتار کرلیاگیا۔قطر کے وزیرخزانہ پر طاقت کےغلط استعمال اور پبلک سیکٹر سے متعلق دیگر جرائم میں ملوث ہونے کے الزامات بھی ہیں۔

علی شریف العمادی 2013 کے بعد سے قطر کے  وزیر خزانہ رہے ہیں اور وہ قطر انویسٹمنٹ اتھارٹی کے  300 ارب ڈالر کے طاقتور خودمختار دولت فنڈ کے بورڈ کا حصہ تھا۔

وہ مشرق وسطی اور افریقہ کے سب سے بڑے قرض دینے والے قطر نیشنل بینک کے بورڈ آف ڈائریکٹرز کے چیئرمین بھی ہیں۔

عمادی نے 2014-2015 کے دوران تیل کی قیمتوں میں کمی کے دوران قطر کی معاشی پالیسیوں کو آگے بڑھایا جس سے قطر سمیت خلیجی ممالک کو بھی معیشت کے حوالے سے فائدہ ہوا۔

قطر جو  مائع قدرتی گیس کی پیدوار کے حوالے سے ایک اہم ملک ہے ،کورونا وائرس بحران اور کم عالمی توانائی کی طلب کی وجہ سے پچھلے سال اس کی معیشت میں 3.7 فیصد کی کمی واقع ہوئی تھی۔

علی شریف عمادی کو ایک بین الاقوامی مالیاتی رسالہ ، جو وزرائے خزانہ کے سالانہ پروگرام  کا اہتمام کرتا ہے ، " بینکر "کے ذریعہ ، خطے میں 2020 کے بہترین وزیر کے طور پر نامزد کیا گیا تھا۔

وزارت خزانہ نے کہا ہے کہ اگلے سال فٹ بال ورلڈ کپ کی میزبانی کرنے والے قطر نے گذشتہ چند سالوں سے انفراسٹرکچر میں بہت زیادہ سرمایہ کاری کی ہے ، جس کا مطلب ہے کہ اس سال بڑے منصوبوں پر خرچ کم ہونا ہے۔