وزیر اعظم نے بجٹ کے بعد کچھ اہم فیصلے لینے کا عندیہ دےدیا

وزیراعظم عمران خان کی وزیراعلی پنجاب سردار عثمان بزدار سے ملاقات کی اندرونی کہانی سامنے آگئی۔وزیراعظم عمران خان نے وزیراعلی پنجاب سردار عثمان بزدار سے شکست کی وجوہات بارے استفسارکیا اور  پنجاب کے ضمنی انتخابات میں تحریک انصاف کی مسلسل شکست پر رپورٹ مانگ لی ہے۔

وزیراعظم عمران خان نے وزیراعلی پنجاب عثمان بزدار کو اہم ٹاسک دیدیا،وزیر اعظم نے حکم دیا کہ آئندہ بجٹ میں عوامی مفاد کے ترقیاتی منصوبوں کو زیادہ ترجیح دی جائے اور  عوامی رابطے مزید بہتر کئے جائیں، محکموں ، ضلعوں میں بلاجواز سیاسی مداخلت کو ختم کیا جائے، سرکاری اداروں تک عوام کی رسائی بہتر بنائی جائے۔

وزیر اعظم عمران خان نے کہا کہ  حکومتی پالیسیاں ایسی ہوں کہ عوام تحریک انصاف کے امیدواروں کو ترجیح دیں،وزیر اعظم نے ہدایت کی کہ  ترقیاتی منصوبوں میں براہ راست عوامی مفاد کو ترجیحات میں شامل رکھا جائے۔

وزیر اعظم کا کہنا تھا کہ  جہاں بھی ضمنی انتخاب ہو ٹیم ورک کے طور پر پارٹی کی سطح پر بہترین ورکنگ ہونی چاہیے، ڈسکہ ضمنی الیکشن  سے متعلق بھی رپورٹ ملی اب خوشاب ضمنی الیکشن سے متعلق بھی رپورٹ مانگ رہا ہوں۔ پنجاب حکومت نے گزشتہ دو سالوں میں بہترین کام کیا، اس سے عوام کو بھی آگاہ کیا جائے۔

وزیراعلی پنجاب نے مختلف گروپنگ میں موجود افراد سے متعلق وزیراعظم کو آگاہ کیا۔وزیر اعظم نے کہا کہ  بجٹ کے بعد کچھ اہم فیصلے لیں گے۔