آج چیئرمین پی ٹی آئی کی سزا معطلی درخواست پر سماعت، فیصلہ متوقع

اسلام آباد: چیئرمین تحریک انصاف عمران خان کی سزامعطل کرنے کی درخواست پرسماعت آج اسلام آباد ہائیکورٹ میں ہوگی، دونوں درخواستوں پر سماعت آج گیارہ بجے ہوگی۔

واضح رہے کہ گزشتہ سماعت پرالیکشن کمیشن کے وکیل امجد پرویز بیماری کے باعث عدالت میں پیش نہیں ہوئے تھے۔

عدالت نےآج الیکشن کمیشن کو متبادل وکیل کا انتطام کرنے کا حکم دے رکھا ہے، گزشتہ سماعت کے دوران چیف جسٹس عمر فاروق نے ریمارکس دیئے تھے کہ ٹرائل کورٹ نے جو کیا غلط کیا، ہم بھی ٹرائل کورٹ والا کام کرسکتے ہیں لیکن ایسا نہیں کریں گے۔

چیف جسٹس نے مزید کہا کہ پیر کو دلائل دیں ورنہ فیصلہ سنا دیں گے۔

یاد رہے کہ چیئرمین پی ٹی آئی نے توشہ خانہ کیس میں ٹرائل کورٹ کی جانب سے دی گئی 3 سال کی سزا معطل کرنے کے لیے اسلام آباد ہائیکورٹ میں درخواست دائر کر رکھی ہے۔

عمران خان کے وکیل سردار لطیف کھوسہ کیس میں اپنے دلائل مکمل کر چکے ہیں اور وہ ٹرائل کورٹ کے فیصلے کو اسلام آباد ہائیکورٹ کے فیصلے کے خلاف قرار دے چکے ہیں۔