سائفر کیس: عمران خان کے جوڈیشل ریمانڈ میں 14 روز کی توسیع

اٹک: سائفر کیس میں پاکستان تحریک انصاف (پی ٹی آئی) کے چیئرمین عمران خان کے جوڈیشل ریمانڈ میں 14 روز کی توسیع کر دی گئی۔

تفصیلات کے مطابق خصوصی عدالت کے جج ابوالحسنات ذوالقرنین کی سربراہی میں اٹک جیل میں سماعت کے دوران ریمانڈ میں توسیع کی گئی۔

عمران خان 13 ستمبر تک جوڈیشل ریمانڈ پر ہوں گے، انہیں خصوصی عدالت کے جج کے روبرو پیش کیا گیا، اٹک جیل میں سائفر کیس کی سماعت فیڈرل انویسٹی گیشن ایجنسی (ایف آئی اے) نے کی۔ سماعت ختم ہوتے ہی جج ابوالحسنات اسلام آباد روانہ ہوگئے۔

سماعت کے دوران جیل کے باہر سیکیورٹی کے سخت انتظامات کیے گئے تھے۔ جیل کے اطراف اٹک پولیس اور ایلیٹ فورس کے دستے تعینات تھے۔

وزارت قانون نے اٹک جیل میں سماعت کی اجازت دے دی۔

دوسری جانب پاکستان تحریک انصاف نے سابق وزیراعظم عمران خان کے خلاف اٹک جیل میں سائفر کیس کی سماعت منتقل کرنے کے فیصلے کو مسترد کر دیا۔

اس سے قبل وزارت قانون نے کیس کی سماعت جیل میں کرنے کی اجازت دی تھی۔

وزارت قانون کی جانب سے جاری نوٹیفکیشن کے مطابق سماعت وزارت داخلہ کے سیکیورٹی خدشات کے باعث اٹک جیل میں ہوگی۔