سعودی معذور سیاح نے مکہ سے مدینہ پیدل سفر 26 دن میں مکمل کرلیا

مکہ مکرمہ: سعودی معذور سیاح احمد یحیی عسیری نے سیکڑوں کلو میٹر پیدل سفر کرکے معذوروں کو چیلنج قبول کرنے کا پیغام دیا ہے۔العربیہ نیوز کے مطابق مدینہ منورہ میں میڈیا سے گفتگو کرتے ہوئے احمد یحیی عسیری نے بتایا کہ دو برس کا تھا کہ دایاں پیر مفلوج ہو ا۔

نشونما کا سلسلہ رک گئی اور ٹانگ پانچ سینٹی میٹر چھوٹی رہ گئی۔ انہوں نے کہا کہ میرا مقصد اپنے معذور بھائیوں کو یہ پیغام دینا تھا کہ معذوری کے باوجود وہ سیر کے لیے نکل سکتے ہیں اور اپنے بارے میں معاشرے کی سوچ تبدیل کر سکتے ہیں۔

ایک سوال پر انہوں نے بتایا کہ انہوں نے دانستہ اپنے لیے الرحال الاعرج ( لنگڑے سیاح ) کا لقب اختیار کیا ہے۔ مجھے فخر ہے کہ میں لنگڑا اور معذور ہوں۔ معذور بھائیوں کی حوصلہ افزائی کے لیے کام کر رہا ہوں۔ احمد یحیی عسیری نے کہا کہ انہوں نے روزانہ 45 منٹ پیدل چلنے کا عزم کیا تھا۔ اس کی ابتدا 45 منٹ سے کی جو اب گھنٹوں اور میلوں کے سفر میں تبدیل ہو چکی ہے۔ انہوں نے بتایا کہ خمیس مشیط سے ابھا کا پیدل سفر دو بار طے کیا۔ خمیس مشیط سے سراۃ عبیدہ کا سفر چار روز میں مکمل کیا۔

انہوں نے کہا کہ اس سے قبل یوم وطنی (نیشنل ڈے) پر الخرج سے دارالحکومت ریاض کی عتیقہ جامع مسجد تک پیدل گیا۔ مسجد التنعیم مکہ مکرمہ سے مدینہ منورہ کا پیدل سفر کر چکا ہوں۔ 25 روز میں مکہ سے مدینہ پہنچا تھا۔ آخری سفر طائف سے ابھا کا کیا ہے۔ 600 کلو میٹر کا یہ سفر 26 دن میں مکمل کیا۔