قومی اقتصادی کونسل نے انسداد پولیو تیسرے نظرثانی شدہ منصوبےکی منظوری دیدی

اسلام آباد: قومی اقتصادی کونسل کی ایگزیکٹو کمیٹی نے انسداد پولیو کے تیسرے نظرثانی شدہ ہنگامی منصوبے کی منظوری دی ہے جس پر ایک ارب78 کروڑ 49 لاکھ ڈالر سے زائد لاگت آئے گی۔

یہ منظوری اسلام آباد میں خزانہ، ریونیو اوراقتصادی اموراورنجکاری کی نگران وزیر ڈاکٹر شمشاد اختر کی زیر صدارت کونسل کے ایک اجلاس میں دی گئی۔

منصوبے میں انسداد پولیو کے عالمی شراکت داروں کی طرف سے ایک ارب19 کروڑ 79 لاکھ ڈالرکی امداد، اسلامی ترقیاتی بنک سے 55 کروڑ20 لاکھ ڈالر قرض اور اے ایف ڈی کے ساڑھے تین کروڑ ڈالر قرض شامل ہیں۔

منصوبے کے تحت ملک بھر میں انسداد پولیو کی ویکسین فراہم کی جائے گی اور عالمی ادارہ صحت اور یونیسیف اس پر عمل درآمد کرائیں گے۔