امریکہ میں پاکستانی ڈاکٹرز،کاروباری شخصیات پاکستان کا اصل چہرہ ہیں، مسعود خان

نیو میکسیکو: امریکہ میں پاکستان کے سفیر مسعود خان نے کہا ہے کہ نیو میکسیکو میں موجود معروف پاکستانی ڈاکٹر، کامیاب کاروباری شخصیات اور دیگر ماہرین پاکستان کا اصل چہرہ ہیں ۔

ان خیالات کااظہار انہوں نے البوکرکی نیو میکسیکو میں پاکستانی امریکن کمیونٹی سے تعلق رکھنے والے ڈاکٹرز، معروف کاروباری اور دیگر پیشہ ورشخصیات سے ملاقات کے دوران کیا۔

مسعود خان نے کہا کہ پاکستانی طلبا، ڈاکٹرز و دیگر پیشہ ور افراد کے لئے امریکی ویزہ کے حصول کو آسان بنانے کے لئے امریکی حکام سے مکالمہ جار ی ہے ۔حالیہ کوششوں کے نتیجے میں پاکستانی طلبا کی تعداد بڑھ کر آٹھ ہزار پانچ سو ہوچکی ہے اس کو دوگنا کریں گے۔

پاکستان کے سفیر نے کہا کہ ہائر ایجوکیشن کمیشن اور یونیورسٹی آف میکسیکو کے مابین تعلیمی پروگرام کے بارے میں آگاہی پیدا کرنے کی ضرورت ہے۔ نیو میکسکو میں موجود پاکستانی مادر وطن میں سرمایہ کاری کریں اور ترقی کے عمل میں حصہ دار بنیں۔

انہوں نے کہا کہ نیو میکسیکو کے اپنے پہلے دورے پر پاکستانی سفیر نے کہا کہ گذشتہ سال محمد افضال حسین کا قتل ایک المناک واقعہ تھا لیکن جس انداز میں نیو میکسیکو کی پاکستانی کمیونٹی نے صبرو استقامت، عزم اور اتحاد کا ثبوت دیا اس سے نہ صرف اس اندوہناک واقعے کے ذمہ دارشخص کو قانون کے کٹہرے میں لانے میں مدد ملی بلکہ خوف اور بے یقینی کی فضا کا خاتمہ ہوا اور کمیونٹی کا اعتماد بحال ہوا۔