سپریم کورٹ نے آڈیولیکس کیس میں حکومتی اعتراض پر محفوظ فیصلہ سنا دیا

اسلام آباد: سپریم کورٹ نے بینچ پر حکومتی اعتراض کو مسترد کر دیا، عدالت نے ججزپراعتراض کوعدلیہ کی آزادی پرحملہ قرار دیا۔

عدالت نے حکومت کی جانب سے بینچ پراعتراض کی درخواست پرسماعت کے بعد 6 جون کو فیصلہ محفوظ کیا تھا جو تین ماہ بعد آج جمعہ کوجسٹس اعجازالاحسن نے سنایا۔

جسٹس اعجاز الاحسن نے فیصلہ سناتے ہوئے کہا کہ ججز پراعتراض عدالت پر حملے کے مترادف ہے۔

سپریم کورٹ اس کیس کا تفصیلی فیصلہ بعد میں جاری کرے گی۔

یاد رہے کہ سابقہ حکومت نے مفادات کے ٹکراؤ پر تین ججز کی بینچ سے علیحدگی کے لیے متفرق درخواست دائرکی تھی، حکومت کی جانب سے بینچ میں شامل جن تین ججوں پر اعتراض اٹھایا گیا ان میں چیف جسٹس عمر عطا بندیال، جسٹس اعجاز الاحسن اور جسٹس منیب اختر شامل تھے۔

عدالتی بینچ نے اس کیس کی دو سماعتیں کیں اور آڈیو لیکس انکوائری کمیشن کو کام کرنے سے روک دیا تھا۔