مراکش میں 6.8 شدت کے زلزلے سے 296 افراد ہلاک ہو گئے

رباط: مراکش میں شدید زلزلے کے نتیجے میں 296 افراد جاں بحق اور سیکڑوں زخمی ہوگئے جب کہ متعدد مکانات، مساجد اور کاروباری مراکز تباہ ہوگئے۔

امریکی جیولوجیکل سروے کے مطابق مراکش کے جنوب مغربی علاقے میں زلزلے کی شدت 6.8 ریکارڈ کی گئی۔

زلزلے کا مرکز مراکش کے شہر سے 75 کلومیٹر دور اٹلس ماؤنٹینز تھا اور اس کی زیر زمین گہرائی 18.5 کلومیٹر ریکارڈ کی گئی۔

مقامی میڈیا کے مطابق زلزلے سے کئی علاقوں کی بجلی غائب ہے جب کہ یونیسکو کی جانب سے عالمی ثقافتی ورثہ قرار دی گئی تاریخی عمارتوں کو بھی نقصان پہنچا ہے۔

مراکشی حکام نے بتایا کہ زلزلے کے نتیجے میں کم از کم 296 افراد کی ہلاکت کی تصدیق ہوئی ہے جب کہ 150 سے زائد افراد زخمی اور مختلف اسپتالوں میں داخل ہیں۔

حکام کا کہنا ہے کہ زلزلے کے نتیجے میں کئی عمارتیں تباہ ہو گئیں جبکہ درجنوں عمارتوں کو جزوی نقصان پہنچا۔

زلزلہ سے متاثرہ علاقوں میں ریسکیو اور ریلیف آپریشن شروع کر دیا گیا ہے اور لوگوں سے ہسپتالوں میں خون کے عطیات دینے کی درخواست کی گئی ہے۔