ارشد شریف قتل کیس اہلیہ سمیعہ ارشد کے ناقابل ضمانت وارنٹ گرفتاری جاری

اسلام آباد: ہفتہ کو وفاقی دارالحکومت کی ایک مقامی عدالت نے سینئر صحافی ارشد شریف مرحوم کی بیوہ سمیعہ ارشد کے ناقابل ضمانت وارنٹ گرفتاری جاری کردیے۔

معروف صحافی اور ایک نجی  نیوز چینل کے سابق اینکر ارشد شریف 23 اکتوبر کو کینیا کے شہر نیروبی میں خود ساختہ جلاوطنی کی زندگی گزارتے ہوئے قتل ہوئے تھے ۔

سمیعہ ارشد اور دیگر 18 افراد کے خلاف یہ وارنٹ گرفتاری جوڈیشل مجسٹریٹ عباس شاہ نے جاری کیے ہیں ۔

وارنٹ ارشد شریف قتل کیس میں مطلوبہ گواہ کے طور پر عدالت میں پیش نہ ہونے کی وجہ سے کیے گئے۔

ارشد شریف کے قتل کے سلسلے میں ریاست کی جانب سے درج ایف آئی آر (فرسٹ انفارمیشن رپورٹ) کے اہم گواہان میں ان کی اہلیہ، بیٹا، پروڈیوسر علی عثمان اور دیگر 16 افراد شامل ہیں۔ 

یاد رہے  کہ ایف آئی آر ریاست کی جانب سے درج کی گئی تھی نہ کہ ارشد شریف کے اہل خانہ کی درخواست پرکی گئی ، جو مقتول صحافی ارشد شریف کے لواحقین کے مطابق پہلے ہی اسے مسترد کر چکے ہیں۔