نائیجریا : کشتی حادثے میں 26 مسافر ہلاک، کئی افراد لاپتہ

نائیجریا کے شمال وسطی علاقے میں موجود مصنوعی جھیل میں مسافر بردار کشتی الٹنے سے 26 افراد ہلاک جبکہ کئی لاپتہ ہو گئے ہیں۔

غیر ملکی میڈیا کے مطابق افسوس ناک واقعہ گزشتہ تین ماہ کے دوران کشتی الٹنے کا دوسرا بڑا واقعہ ہے۔

حکام کے مطابق اتوار کے روز پیش آنے والے اس واقع میں کشتی پر خواتین اور بچوں سمیت 100 سے زائد افراد سوار تھے، اب تک 26 افراد کے ہلاک ہونے کی تصدیق کی گئی ہے جس میں بچوں اور خواتین کی اکثریت شامل ہے۔

 مسافر مصنوعی جھیل پر کشتی کے ذریعے اپنی زرعی زمینوں پر جا رہے تھے۔

حادثے کے بعد کشتی میں سوار 30 مسافروں کو ریسکیو کر لیا گیا ہے جبکہ دیگر لاپتہ افراد کی تلاش کیلئے ریسکیو آپریشن جاری ہے۔

یاد رہے کہ اس سے قبل جولائی میں کشتی ڈوبنے کے واقعے میں 100 سے زائد افراد ہلاک ہو گئے تھے۔