حکومت اخراجات کو کم اور آمدنی میں اضافے کیلئے اقدامات کررہی ہے ،وزیراعظم

اسلام آباد: نگران وزیراعظم انوارالحق کاکڑ نے کہاہے کہ حکومت ایک قابل عمل ریاست اورحکومتی اخراجات کومعقول بنانے،آمدنی میں اضافے اورمعاشی کمزوریوں کی وجہ سے وجود کو لاحق خطرات کم کرنے کے لئے اقدامات کررہی ہے۔

ایک نجی ٹیلی ویژن کے ساتھ ایک انٹرویومیں انہوں نے کہا کہ وزیرخزانہ کی سربراہی میں ایک ٹاسک فورس وفاقی اورصوبائی حکومتوں کے حجم کاتعین کرے گی، اس کے علاوہ سرکاری اخراجات کو معقول بنانے اورآمدنی میں اضافے کے لئے کوشش کرے گی۔

انوارالحق کاکڑ نے کہاکہ خصوصی سرمایہ کاری سہولت کونسل مناسب نظم ونسق کے حصول اور ماضی کی ناقص حکمرانی کی وجوہات دور کرنے میں معاونت کے لئے کوشاں ہے۔انہوں نے کہاکہ نگران حکومت اورفوجی قیادت کااس حوالے سے واضح موقف ہے کہ ایران اور افغانستان کی سرحدوں سے اشیاء اورافراد کی نقل وحرکت کو ریگولیٹ کیاجائے۔

ایک سوال کے جواب میں وزیراعظم نے کہاکہ انتخابات کی تاریخ کااعلان کرناالیکشن کمیشن کا اختیارہے۔انہوں نے کہاکہ عام انتخابات آئندہ سال مارچ سے پہلے ہوجانے چاہئیں تاکہ موجودہ سینیٹرز کے ریٹائر ہونے پر خالی نشستیں پُر کرنے کے لئے سینیٹ انتخابات منعقدہوسکیں۔