16 مئی تک تمام تجارتی مراکز اور سیاحتی مقامات کو بند رکھا جائے گا، این سی او سی

تفصیلات کے مطابق  وفاقی وزیر اسد عمر کی زیر صدارت این سی او سی کا خصوصی اجلاس  ہوا، اس  اجلاس میں 8 سے 16 مئی تک ملک بھر میں شہریوں کی نقل و حمل روکنے کے لیے نافذ ایس او پیز کا جائزہ لیا گیا۔اجلاس میں چاروں صوبوں کے چیف سیکریٹریز نے بھی شرکت کی۔جبکہ اجلاس میں 8 سے 16 مئی تک ایس او پیز کے نفاذ کے حوالے سے حکمت عملی کا بھی جائزہ لیا گیا۔

این سی او سی کے مطابق ان ایام کے دوران تمام تجارتی مراکز اور سیاحتی مقامات کو بند رکھا جائے گا، میڈیکل سٹورز، ویکسینیشن سینٹرز، بیکریز پابندی سے مستثنٰی ہونگے۔ سیاحتی سرگرمیوں پر لوکل اور غیر ملکی شہریوں کے لیے مکمل طور پر پابندی ہوگی، تمام سیاحتی مراکز، ہوٹلز اور پکنک پوائینٹس ان ایام کے دوران بند رہیں گے، کسی بھی سیاحتی مقامات پر جانے والے سیاحوں کو واپس بھیج دیا جائے گا اور  اس حوالے سے تمام ہوٹلز کی بکنگز کو بھی کینسل کر دیا گیا ہے ۔

این سی او سی کے مطابق  بین الالصوبائی اور انٹر سٹی ٹرانسپورٹ پر عائد مکمل پابندی برقرار رہے گی، نجی گاڑیوں بشمول ٹیکسی اور کیب سروس کو 50 فیصد سواریوں کے ساتھ چلنے کی اجازت ہوگی۔

اجلاس میں مختلف شہروں میں رپورٹ ہونے والی ایس او پیز خلاف ورزیوں پر تشویش کا اظہار کیا گیا۔این سی او سی نے ایس او پیز پر اطلاق کے لیے جامع پالیسی بنانے کے لئے صوبوں کو خصوصی ہدایات کردی۔