عدالت نے عابد باکسر کا سات روزہ جسمانی ریمانڈ منظور کرلیا

لاہور: انسداد دہشت گردی کی عدالت (اے ٹی سی) لاہور نے جمعرات کو سابق پولیس انسپکٹر عابد باکسر کا سات روزہ جسمانی ریمانڈ منظور کرلیا۔

تفصیلات کے مطابق اے ٹی سی کے جج ابھر گل خان نے تفتیشی افسر سے آئندہ سماعت پر رپورٹ طلب کرتے ہوئے عابد باکسر کو 26 اکتوبر کو دوبارہ پیش ہونے کا حکم دیا ہے۔

پولیس نے تفتیش کے لیے ملزمان کے 30 روزہ جسمانی ریمانڈ کی استدعا کی۔ تاہم عدالت نے پولیس کی استدعا مسترد کرتے ہوئے ملزم عابد باکسر کا سات روزہ جسمانی ریمانڈ منظور کرلیا۔

عابد باکسر کو پولیس اہلکار سے رائفل چھیننے اور مبینہ طور پر پولیس کی حراست سے فرار ہونے کے مقدمے میں پیش کیا گیا تھا۔

سابق پولیس افسر کو گزشتہ رات سی آئی اے سول لائنز کی ٹیم نے قصور سے گرفتار کیا تھا۔

عابد باکسر کے خلاف تھانہ فیصل ٹاؤن میں مقدمہ درج کر لیا گیا ہے جبکہ ملزمان کے خلاف لاہور کے دو دیگر تھانوں میں بھی مقدمات درج ہیں۔