سعودی ولی عہد شہزادہ محمد بن سلمان اور جاپانی وزیر اعظم فمیو کیشیدا کے درمیان ٹیلی فونک رابطہ

غزہ پر جاری حملوں اور فوج کے استعمال میں اضافے پر سعودی ولی عہد شہزادہ محمد بن سلمان اور جاپان کے وزیر اعظم فمیو کیشیدا کے درمیان فون پر تبادلہ خیال کیا گیا ہے۔

سعودی خبر رساں ادارے ایس پی اے کے مطابق ولی عہد شہزادہ محمد بن سلمان نے زور دیا کہ غزہ میں سویلین آبادی کو نشانہ بنا کر بمباری اور حملے کرنا بین الاقوامی قانون کی خلاف ورزی اور سنگین جرم ہے۔

سعودی ولی عہد اور جاپانی وزیر اعظم فمیو کیشیدا نے اپنے دو طرفہ گفتگو میں غزہ میں جاری تصادم کے بارے میں بین الاقوامی سطح پر پائی جانے والی تشویش کا بھی ذکر کیا۔ دونوں رہنماوں نے تصادم کو روکنے کے لیے خطے میں امن و استحکام لانے کی اجتماعی کوششوں کی ضرورت پر زور دیا۔

انہوں نے خطے میں عام لوگوں اور معصوم شہریوں کا تحفظ یقینی بنانے کی اہمیت پر زور دیا۔ ولی عہد نے اس موقع پر فوجی کارروائیاں کم کرنے کی کوششوں کو بڑھاوا دینے کے اپنے موقف کا اعاداہ کیا تاکہ سلامتی کو درپیش خطرات میں کمی لائی جا سکے۔ نتیجیتاً خطے میں ہی نہیں پوری دنیا میں امن و استحکام لایا جا سکے۔