چیئرمین پی ٹی آئی کا سائفر کیس کی اوپن سماعت کے لیے انٹرا کورٹ اپیل دائر کرنےکافیصلہ

 چیئرمین پی ٹی آئی عمران خان نے سائفر کیس کی اوپن سماعت کیلئے انٹراکورٹ اپیل دائر کرنے کا فیصلہ کیا ہے۔

وکیل شیراز رانجھا نے کہاکہ چیئرمین پی ٹی آئی عمران خان نے انٹراکورٹ اپیل دائر کرنے کی ہدایت کی،چیئرمین پی ٹی آئی نے سینئیر قانون دان سلمان اکرم راجہ کو انٹراکورٹ اپیل دائر کرنے کا کہہ دیا ہے۔

وکیل شیراز احمد رانجھا نے کہا کہ سلمان اکرم راجہ سنگل بینچ کے فیصلے کے خلاف انٹراکورٹ اپیل دائر کرینگے،سنگل بینچ نے جیل ٹرائل کے خلاف درخواست مسترد کردی تھی،چیئرمین پی ٹی آئی عمران خان چاہتے ہیں کہ سائفر کیس کی سماعت جیل کی بجائے اوپن کورٹ میں ہو۔

واضع رہے کہ اسلام آباد ہائی کورٹ کے چیف جسٹس عامر فاروق نے عمران خان کی سائفر کیس میں اوپن کورٹ کی اپیل مسترد کرتے ہوئے کہا تھا کہ چیئرمین پی ٹی آئی خود کئی بار سکیورٹی خدشات کا اظہار کر چکے ہیں، ان کی جان کو خطرہ ہے، اب جب جیل میں ٹرائل جاری ہے تو ان کو کیا مسئلہ ہے،اگر انہیں کوئی خدشات ہیں تو وہ انٹراکورٹ اپیل دائر کر سکتے ہیں۔