پنجاب یونیورسٹی کا تما م کلاسز 23 مئی تک بند رکھنے کا فیصلہ

کورونا وائرس کے بڑھتے ہوئے کیسز کے پیشِ نظر اور این سی او سی کی ہدایات کے مطابق  پنجاب یونیورسٹی نے آن لائن اور فزیکل کلاسز 23 مئی تک بند رکھنے کا فیصلہ کیا ہے۔

ترجمان پنجاب یونیورسٹی کا کہنا ہے کہ  23 مئی تک ہاسٹلز بھی بند رکھے جائیں گے اور  این سی او سی کی ہدایات کے مطابق آئندہ کا لائحہ عمل طے کیا جائے گا۔

چند دن قبل  تعلیمی اداروں کےحوالے نیشنل کمانڈ اینڈ آپریشن سینٹر (این سی او سی)  کا خصوصی اجلاس ہوا تھا۔جس میں  این سی او سی نے فیصلہ کیا کہ  ملک بھرمیں تعلیمی ادارے 23 مئی تک بند رہیں گے۔

این سی او سی کا کہنا تھا کہ تعلیمی اداروں کی بندش کے حوالے سے 18 مئی کودوبارہ جائزہ لیا جائےگا۔

ملک  میں کورونا وائرس کی تیسری لہر جاری ہے اور یومیہ کیسز اور اموات میں اضافہ دیکھا جارہا ہے ۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید104افراد چل بسے ۔ ملک میں  اموات کی مجموعی تعداد 19 ہزار210ہوگئی ہے،جبکہ  متاثرہ افراد کی کی تعداد 8 لاکھ 67 ہزار438  ہوگئی ہے ۔ گزشتہ 24 گھنٹوں میں مثبت کیسز کی شرح 7.42 فیصد رہی۔

پنجاب

پنجاب میں کورونا مریضوں کی تعداد3 لاکھ 22 ہزار 117 ہوگئی ۔ جبکہ صوبے میں اب تک 9ہزار 125افراد جان سے ہاتھ دھو بیٹھے ہیں ۔

سندھ

سندھ میں کورونا وائرس سے سب سے زیادہ متاثرہ مریضوں کی تعداد  2 لاکھ 94 ہزار 251 ہو گئی جبکہ صوبے میں اب تک 4 ہزار 645 افراد جان کی بازی ہار گئے ۔

خیبرپختون خوا

خیبرپختون خوا میں کورونا وائرس سے متاثرہ مریضوں کی تعداد ایک لاکھ 25 ہزار 392 ہوچکی ہے ۔ صوبے میں 3310افراد چل بسے۔

بلوچستان

بلوچستان میں کورونا وائرس کے اب تک 23 ہزار 655 کیسز رپورٹ ہوئے ہیں جبکہ صوبے میں 236مریض چل بسے ۔

اسلام آباد

وفاقی دارالحکومت اسلام آباد میں مجموعی طورپرمتاثرہ افراد کی تعداد78 ہزار 560جبکہ اموات کی تعداد683تک جاپہنچی ۔

گلگت بلتستان

گلگت بلتستان میں اب تک  5 ہزار 407افراد کورونا کا شکار ہوئے ہیں جبکہ 107افراد جان سے ہاتھ دھو بیٹھے ۔

آزاد کشمیر

آزاد جموں کشمیرمیں کورونا سےمتاثرہ افراد کی تعداد 18 ہزار 056ہوچکی ہے جبکہ 476افراد جان کی بازی ہار گئے ۔

ملک بھرمیں صحت یاب ہونے والے افراد کی تعداد بھی تیزی سے بڑھنے لگی ہے، این سی اوسی کے مطابق گزشتہ  24گھنٹوں میں  5544فرادکوروناوائرس کوشکست دےچکے ہیں۔ ملک بھر میں اب تک 7لاکھ 17 ہزار009مریض کورونا کو شکست دے چکے ہیں ۔

واضح رہے کہ پاکستان میں کورونا وائرس کا پہلا کیس 26 فروری 2020 کو ملک کے سب سے بڑے شہر کراچی میں سامنے آیا تھا ۔