نگران وزیرا عظم کا فلسطینی صدر سے رابطہ ،اسرائیلی حملوں کی مذمت

وزیراعظم انوار الحق کاکڑ نے غزہ اور مغربی کنارے میں بے گناہ فلسطینیوں پر قابض اسرائیلی فوج کے جاری مظالم کے تناظر میں فلسطینی صدر محمود عباس سے ٹیلی فون پر گفتگو کے دوران علاقے کی تازہ ترین صورتحال پر تبادلہ خیال کیا۔

وزیراعظم نے کہا کہ پاکستان اسرائیلی قابض فوج کی جانب سے جاری شدید بمباری خصوصاً اہلی ہسپتال کو نشانہ بنانے کی شدید مذمت کرتا ہے۔

دونوں رہنمائوں نے خونریزی فوری طور پربند کرانے کیلئے بین الاقوامی برادری کی جانب سے اسرائیل پر دبائو ڈالنے کی ضرورت پر زور دیا۔

وزیراعظم نے بین الاقوامی برادری خصوصاً اقوام متحدہ پر زور دیا کہ وہ اس تنازع کے حل کیلئے ٹھوس اقدامات کرے اور انصاف، انسانیت اور عالمی قوانین کی پاسداری یقینی بنائے۔

وزیراعظم نے مسئلہ فلسطین کے منصفانہ اور پائیدار حل کیلئے پاکستان کی غیر متزلزل حمایت کا اعادہ کیا جس کی بنیاد دو ریاستی حل ہے۔

فلسطین کے صدر نے اسرائیلی قبضے سے فلسطینیوں کی جدوجہد آزادی میں پاکستان کی دیرینہ اور مسلسل حمایت کا شکریہ ادا کیا۔