بنگلادیش: مسافر ٹرین ، مال بردار ٹرین تصادم، 17 افراد ہلاک، 100 سے زائد زخمی

بنگلادیش میں کشور گنج کے علاقے بھیرب کے قریب مسافر ٹرین اور مال گاڑی آپس میں ٹکرا گئیں، نتیجے میں 17 افراد ہلاک جبکہ 100 سے زائد زخمی ہوگئے۔

بنگلادیشی میڈیا کے مطابق حکام کا کہنا ہے کہ حادثے کے نتیجے میں پٹری سے اترنے والی مسافر ٹرین کی دوبوگیوں میں پھنسے افراد اور لاشیں نکالنے کیلئے امدادی سرگرمیاں جاری ہیں۔ 

ڈھاکہ کے شمال مشرق میں 80 کلومیٹر (50 میل) کے فاصلے پر بھیراب میں ایک مال بردار ٹرین مسافر ٹرین کے پچھلے ڈبوں سے ٹکرا گئی۔

زیادہ تر لوگ موقع پر ہی ہلاک ہو گئے، تین زخمی افراد ہسپتال میں دم توڑ گئے جہاں 50 کے قریب زخمیوں کا علاج کیا جا رہا ہے، ہلاکتوں کی تعداد میں مزید اضافہ ہو سکتا ہے۔

حکام کے مطابق حادثے کا شکار ہونے والی ٹرین کی بوگیوں سے اب تک 17 افراد کی لاشیں نکالی گئی ہیں، تاہم ہلاکتوں میں اضافے کا خدشہ ہے۔