سردی کی شدت میں اضافے کے ساتھ ہی خشک میوہ جات کی قیمتوں کو پر لگ گئے

اسلام آباد: سردی کی شدت میں اضافے کے ساتھ ہی خشک میوہ جات کی قیمتوں کو پر لگ گئے ۔جڑواں شہروں سمیت ملک بھر میں سردی کی شدت میں اضافے کے ساتھ ہی جہاں خشک میوہ جات کی مانگ میں یکدم اضافہ ہوا ہے وہیں خشک میوہ جات کی قیمتیں بھی آسمان کو چھونے لگی ہیں۔

شہریوں نے ’’اے پی پی ‘‘کو بتایاکہ جڑواں شہروںمیں ڈرائی فروٹس کے دکانداروں نے من مانی شروع کردی ہے اور خشک میوہ جات انتہائی مہنگے داموں فروخت کئے جارہے ہیں ۔

دوسری جانب خشک میوہ جات کے دکانداروں کاکہنا ہے کہ گذشتہ برس کی نسبت دیگر اشیاء کی طرح خشک میوہ جات کی قیمتوں میں بھی اضافہ ہوا ہے اور دکانداروں کا منافع کم ہو گیاہے ۔’’اے پی پی ‘‘کو دستیاب معلومات کے مطابق مونگ پھلی 450روپے سے 750روپے فی کلوگرام،انجیر 1500روپے سے 3200روپے فی کلوگرام ، چلغوزہ6ہزار روپے سے 9ہزار روپے فی کلوگرام ،بادام مختلف اقسام 19سو روپے سے 28سو روپے فی کلوگرام ، کاجو 3ہزار روپے سے4ہزار روپے فی کلوگرام ، کاغذی اخروٹ 800روپے سے 1200 روپے فی کلوگرام ، پستہ مغز سادہ و نمکین 3ہزار روپے سے 35سو روپے فی کلوگرام ،کشمش 700روپے سے ایک ہزار روپے فی کلو گرام اور ریوڑی 600روپے سے 800روپے فی کلو گرام فروخت کی جا رہی ہے۔