دنیا میں قیام امن کے لئے کشمیر اورفلسطین میں امن کا قیام نہایت ضروری ہے ،صادق سنجرانی

سینیٹ کے چیئرمین صادق سنجرانی نے کہاہے کہ دنیا میں قیام امن کے لئے کشمیر اورفلسطین کے مسائل کاحل ناگزیرہے۔

بیجنگ میں ہمسایہ ممالک کے درمیان سفارتی تعلقات کومستحکم کرنے کے بارے میں بین الاقوامی سمپوزیم سے خطاب کرتے ہوئے انہوں نے کہاکہ ہمیں بھارت کے غیرقانونی زیرقبضہ جمو ں وکشمیر اورفلسطین میں نسل کشی اورانسانی حقوق کی خلاف ورزیوں کی روک تھام کے لئے ایک مشترکہ لائحہ عمل اختیارکرناچاہیے۔

انہوں نے کہاکہ بھارت کے غیرقانونی زیرقبضہ جموں وکشمیر اور فلسطین میں مظالم کو بند کرائے بغیرعالمی سطح پر امن کاقیام ناممکن ہے۔صادق سنجرانی نے کہاکہ پاکستان اورچین نے باہمی احترام، عدم جارحیت اورپرامن بقائے باہمی کو فروغ دیاہے۔

انہوں نے کہاکہ چین کے صدرشی جن پنگ کی قیادت اوربصیرت نے نہ صرف چین کو نئی بلندیوں تک پہنچایاہے بلکہ اس کی عالمی شراکت داری کی راہ بھی ہموار کی ہے۔