سلامتی کونسل ، روس نے امریکی قرارداد کو مسترد کر دیا

 اقوام متحدہ کی سلامتی کونسل کے اجلاس میں اسرائیل فلسطین کشیدگی پر روس نے امریکی تجاویز پر اعتراض کرتے ہوئے قرارداد کو مسترد کر دیا۔

غیر ملکی خبر رساں ایجنسی کے مطابق اقوام متحدہ کی سلامتی کونسل کے ہنگامی اجلاس میں روسی مندوب نے اسرائیل فلسطین کشیدگی پر امریکی تجاویز کو مسترد کیا۔ روسی مندوب نے کہا کہ تمام دنیا غزہ میں غیر مشروط جنگ بندی پر روز دے رہی ہے لیکن امریکی قرارداد میں غیر مشروط جنگ بندی کی بات ہی نہیں۔

پاکستانی کے مستقل مندوب منیر اکرم نے غزہ پر اسرائیلی جارحیت کی مذمت کرتے ہوئے کہا کہ پاکستان غزہ میں فوری اور غیر مشروط جنگ بندی کا مطالبہ کرتا ہے جبکہ اسرائیلی فوج نے غزہ میں اسکولوں، اسپتالوں اور رہائشی علاقوں کو نشانہ بنایا۔ انہوں نے کہا کہ غزہ پر حملہ عالمی قوانین کی خلاف ورزی اور جنگی جرائم میں شامل ہے۔

چینی مندوب نے کہا کہ سب سے پہلے جامع جنگ بندی ہونی چاہیے اور غزہ میں بڑے انسانی المیے کو روکنا ہماری اولین ترجیح ہے۔

اس موقع پر امریکی وزیر خارجہ نے کہا کہ غزہ میں امداد کی رسائی کیلئے جنگ بندی پر غور کی تجویز کے ساتھ ہمیں کسی بھی قوم کے دفاع کے حق کی توثیق کرنی چاہیے۔