مولانا طارق جمیل کے صاحبزادے کی نماز جنازہ آج ادا کی جائے گی

عالم دین مولانا طارق جمیل کے صاحبزادے مرحوم عاصم جمیل کی نماز جنازہ آج (پیر) ان کے آبائی گاؤں میں ادا کی جائے گی۔

مولانا طارق جمیل نے سماجی رابطے کی ویب سائٹ ایکس کو ٹور کرتے ہوئے اپنے مرحوم بیٹے کی نماز جنازہ سے متعلق آگاہ کیا۔

انہوں نے لکھا کہ میرے مرحوم بیٹے عاصم جمیل کی نماز جنازہ آج 30 اکتوبر بروز پیر شام 7:30 بجے ہمارے آبائی گاؤں رئیس آباد تلمبہ میں ادا کی جائے گی۔

واضح رہے کہ گزشتہ روز مولانا طارق جمیل نے سوشل میڈیا کے ذریعے بیٹے کی حادثاتی موت کی تصدیق کرتے ہوئے لکھا تھا کہ ان کا بیٹا عاصم جمیل تلمبہ میں انتقال کر گیا ہے۔ اس کے ساتھ انہوں نے اپنے مرحوم بیٹے اور ان کے اہل خانہ کے لیے دعاؤں کی درخواست کی۔

ریجنل پولیس آفیسر (آر پی او) ملتان کیپٹن (ر) سہیل چوہدری نے بتایا کہ مولانا طارق جمیل کے بیٹے نے خودکشی کی ہے، ڈی پی او نے سی سی ٹی وی فوٹیج دیکھ لی ہے۔

آر پی او ملتان کے مطابق عاصم جمیل نفسیاتی مریض تھے اور کئی سالوں سے ادویات پر تھے۔

پولیس نے مزید بتایا کہ عاصم جمیل نے اپنے ملازم عمران سے پستول مانگا اور 30 بور پستول سے خود کو گولی مار لی۔ پولیس کے مطابق عاصم جمیل نے محبت کی شادی کی تھی اور بعد میں طلاق ہوگئی۔