سینیٹ اجلاس میں اسرائیلی مظالم کی پر زور مذمت

سینیٹ نے بے گناہ فلسطینی عوام کے خلاف اسرائیلی مظالم پرتشویش ظاہر کرتے ہوئے فوری جنگ بندی پر زوردیا ہے ۔

ایوان نے آزاد فلسطین کے قیام کی حمایت اورانصاف کیلئے عالمی اداروں کی ضرورت کا اعادہ کیا ۔ 

فلسطین میں موجود صورتحال پر بحث کیلئے خصوصی اجلاس بلایاگیا تھا اورایوان نے قاعدہ 218 کے تحت ایک تحریک پر بحث شروع کی جو تمام سیاسی جماعتوں کے سینیٹرز کی جانب سے مشترکہ طورپر پیش کی گئی تھی۔

بحث کا آغاز کرتے ہوئے قائدایوان اسحاق ڈار نے کہاکہ غزہ میں فلسطینیوں کا قتل عام اور نسل کشی امت مسلم اور ساری دنیا کیلئے تشویش کا باعث ہے ۔

غزہ میں اسرائیلی مظالم کی پرزورمذمت کرتے ہوئے انہوں نے کہاکہ پاکستان کو او آئی سی سمیت مختلف فورم پر فلسطینی عوام کیلئے مضبوط آواز اٹھانی چاہیے ۔

اسحاق ڈار نے کہاکہ عالمی برادری کو آزاد فلسطینی ریاست کے قیام کیلئے اپنا کردار ادا کرناچاہیے ۔

شہزاد وسیم نے کہاکہ اسرائیل نے خود کو غاصب اور دہشت گرد ریاست ثابت کیا ہے جو بین الاقوامی قوانین اور انسانیت کا کوئی لحاظ نہیں رکھتا ۔

انسانی حقوق تنظیموں کی خاموشی پرافسوس کااظہارکرتے ہوئے انہوں نے کہا کہ دنیا کو غزہ میں اسرائیلی جارحیت کی مذمت کرنی چاہیے ۔

بحث میں حصہ لیتے ہوئے سید یوسف رضا گیلانی نے کہاکہ ہسپتال جیسی تنصیبات سمیت غزہ پر اسرائیلی بمباری بین الاقوامی قوانین کی خلاف ورزی ہے ۔

علی ظفر نے غزہ میں فوری جنگ بندی کا مطالبہ کیا اورکہاکہ اقوام متحدہ کو فلسطین اور کشمیر دونوں مسائل کے حل کیلئے آگے بڑھنا چاہیے ۔

عبدالغفور حیدری نے کہاکہ اسلامی تعاون تنظیم کے ملکوں کو فلسطینی عوام کے جان ومال کے تحفظ کیلئے اپنا کردارادا کرناچاہیے۔

مشتاق احمد نے کہاکہ اسرائیل غزہ میں جنگی جرائم کا مرتکب ہورہاہے ۔

منظور احمد نے کہاکہ مسلمان ملکوں کو فلسطینی عوام کے ساتھ مکمل اظہار یکجہتی کرنی چاہیے ۔

طاہر بزنجو نے کہاکہ اسرائلی فلسطینی تنازع کا واحد پرامن حل دو ریاستوں کا قیام ہے ۔

وزیرداخلہ سرفراز بگٹی نے کہا ہے کہ بلوچستان لبریشن آرمی، بلوچ لبریشن فرنٹ اور لشکر بلوچستان جیسے جنگجو گروپ بلوچستان میں بے گناہ شہریوں اورسیکورٹی فورسز کے اہلکاروں کو مارنے کے واقعات میں ملوث ہیں ۔

آج سینیٹ میں رضا ربانی کی جانب سے ایک نکتہ اعتراض کے جوا ب میں انہوں نے کہاکہ سیکورٹی فورسز ان جنگجو گروپوں کے خلاف کارروائیاں کررہی ہیں ۔

انہوں نے کہاکہ یہ پارلیمنٹ کی ذمہ داری ہے کہ وہ قانون سازی کرتے ہوئے شدت پسندی سے موثر انداز میں نمٹنے کیلئے سیکورٹی فورسزکو مزید مضبوط بنانے میں معاونت فراہم کرے ۔

ایوان کا اجلاس اب کل سہ پہر2:30 بجے تک ملتوی کردیاگیا ہے۔