اب تک دولاکھ افغان باشندے اپنے وطن واپس جا چکے ہیں ،سرفراز بگٹی

وفاقی کابینہ نے اس تاثر کو مسترد کردیا ہے کہ ملک سے صرف غیرقانونی طورپر مقیم افغان باشندوں کو ملک واپس بھیجاجارہا ہے ۔

 اسلام آباد میں وزیراعظم کاکڑ کے زیر صدارت وفاقی کابینہ کی جانب سے کیے گئے فیصلوں سے متعلق میڈیا بریفنگ میں نگران وزیر داخلہ سرفراز بگٹی نے کہاکہ تقریباً دو لاکھ افغان باشندے اب تک اپنے وطن واپس جاچکے ہیں۔

انہوں نے کہاکہ واپس بھجوائے گئے افراد مکمل دستاویزات کے بعد پاکستان میں دوبارہ داخل ہوسکتے ہیں۔

اس موقع پر اظہار خیال کرتے ہوئے نگران وزیر صحت ڈاکٹر ندیم جان نے کہاکہ بنیادی حفظان صحت کو بہتر بنانے کا منصوبہ شروع کیاگیا جس میں عسکریت پسندی اور سیلاب سے متاثر ہونے والے بنیادی صحت مراکز کی تزائین وآرائش پرخصوصی توجہ دی جارہی ہے۔

ایک سوال کے جواب میں انہوں نے کہاکہ ہسپتالوں میں تمام بھرتیاں میرٹ پر کی جائیںگی ۔

ملک کے صحت کے شعبے کو ترقی دینے کیلئے اٹھائے گئے اقدامات کو اجاگر کرتے ہوئے انہوں نے کہاکہ النسولیٹرز اور ایم آر آئی مشینیں ہسپتالوں میں نصب کردی گئی ہیں۔

ایک اور سوال کے جواب میں وزیر اطلاعات ونشریات مرتضی سولنگی نے کہاکہ نگران حکومت کا کوئی سیاسی ایجنڈا نہیں ہے ہم آئینی حدود میں اپنا کام کررہے ہیں ۔

انہوں نے شفقت محمود کے ساتھ سیاسی ملاقات کی خبروں کو یکسر مستردکردیا۔

ایک سوال کے جواب میں ایڈیشنل سیکرٹری وزارت مذہبی امور سید عطا الرحمان نے بتایا کہ پی آئی اے کو 5.5 ارب روپے کی زیر التوا رقم آج ادا کر دی جائے گی۔

انہوں نے کہا کہ مجوزہ حج پالیسی کے تحت اسپانسر شپ حج برقرار رہے گی۔

انہوں نے کہا کہ اس سکیم کے تحت تقریبا 25000 افراد سرکاری سکیم کے ذریعے حج کریں گے جبکہ 44000 لوگوں کو پرائیویٹ حج سکیم سے رہائش دی جائے گی۔