غزہ پر کوئی کٹھ پتلی حکومت قبول نہیں کرین گے، حماس

غزہ: فلسطینی تحریک مزاحمت حماس کے رہنما اسامہ بن حمد نے کہاکہ غزہ کی پٹی پر کوئی کٹھ پتلی حکومت قبول نہیں کریں گے ۔ انہوں نے پریس کانفرنس میں حماس کے بغیر غزہ اور غزہ کے مستقبل کا تعین کرنے کی امریکی تجویز کو مسترد کرتے ہوئے کہا کہ جو یہ سوچ رہے ہیں کہ حماس ختم یا غائب ہو جائے گی انہیں بتانا چاہتے ہیں کہ کوئی زمینی طاقت حماس کو ختم کر سکتی ہے نہ اس کے اثرات کو کم کر سکتی ہے۔

انہوں نے کہاکہ حماس غزہ کی پٹی پر کوئی کٹھ پتلی حکومت قبول نہیں کرے گی۔ بلکہ حماس ہی غزہ میں رہے گی۔ انہوں نے کہا کہ حماس فلسطینی عوام کے دلوں میں اور ان کے شعور میں رہے گی، کوئی زمینی قوت حماس کو ختم یا کمزور نہیں کر سکتی۔ انہوں نے کہاکہ اسرائیل کے اتحادی امریکا نے حماس کو منظر سے ہٹانے کی منصوبہ بندی کی ہے۔

یہ ایسا ہی تصور ہے جیسا جنگ عظیم دوم کے دوران نازیوں کی کٹھ پتلی ریاست فرانس میں بنانے کی کوشش کی گئی تھی۔ انہوں نے مزید کہاکہ ہمارے لوگ امریکا کو اپنے اوپر مسلط نہیں ہونے دیں گے۔ ایسی انتظامیہ جو امریکا اور اسرائیل کے لیے اچھی ہوہمارے لوگ ایسی حکومت غزہ میں قبول نہیں کریں گے۔