انوکھے لاڈلے کو بتانا چاہتا ہوں کہ فیصلے آسمانوں پر ہوتے ہیں، شیخ رشید

سابق وفاقی وزیر داخلہ اور سربراہ عوامی مسلم لیگ شیخ رشید نے کہا کہ انوکھے لاڈلے کو بتانا چاہتا ہوں کہ فیصلے آسمانوں پر ہوتے ہیں، اگر جیل سے الیکشن لڑنا ہے تو میں نے لال رضائی لے لی ہے۔

اسلام آباد ہائیکورٹ میں میڈیا سے گفتگو کرتے ہوئے شیخ رشید نے کہا کہ بلوچستان کی 16 سیٹیں ہیں جن میں 3سیٹیس انوکھا لاڈلا لے گا جب کہ 3 سے 4 سیٹیں فضل الرحمان لے گا،زرداری بھی تاش چھاتی سے لگا کر کھیلتا ہے وہ بھی 4 سیٹیں جیت جائے گا، اصل لڑائی تو پنجاب میں ہے۔

اسلام آباد : سابق وفاقی وزیر داخلہ شیخ رشید احمد کی اسلام آباد ہائیکورٹ کے باہر میڈیا سے گفتگو pic.twitter.com/wsqnNhisft

— Sheikh Rashid Ahmed (@ShkhRasheed) November 16, 2023

انہوں نے کہا کہ میرے اوپر80 سے زائد مقدمات درج ہو چکے ہیں لیکن اس کی اصل حقیقت کا کل کی رٹ کے بعد پتا چلے گا، اس کے خلاف کل لاہور ہائیکورٹ راولپنڈی بینچ میں درخواست دائر کروں گا اور اگر میں نے جیل سے ہی 2 سیٹوں کا الیکشن لڑنا ہے تو میں نے رضائی لے لی ہے۔

شیخ رشید نے کہا کہ میں نے کسی کے خلاف کوئی بیان نہیں دیا، یہ جو انوکھا لاڈلا سمجھ رہا ہے، میں بھی ان کے ساتھ رہا ہوں، انوکھے لاڈلے کو کہنا چاہتا ہوں فیصلہ آسمانوں پر ہوتا ہے۔ہارتا وہی ہے جو ہار مان لیتا ہے۔ اس عمر میں بھی میں نے کسی دوست کے خلاف، کسی خاندان کے خلاف کوئی بیان نہیں دیا۔

شیخ رشید نے کہا ہے کہ ایسے لگتا ہے میں پاکستان میں دوسرے نمبر پر دہشت گرد ہوں،وفاق میں حکومت بنانے کے لیے بلوچستان نہیں پنجاب کے رزلٹس ہیں،بلوچستان سے ہر پارٹی تین سے چار سیٹیں ہی لے سکتی ہے،سیاست کا اور حکومت بنانے کا فیصلہ پنجاب میں انتخابات کے رزلٹ پر منحصر ہے۔