سائفر کیس، اسلام آباد ہائیکورٹ کی ٹرائل روکنے کےحکم میں ایک دن کی توسیع

 اسلام آباد ہائی کورٹ نے چیئرمین پی ٹی آئی کے سائفر کیس میں جیل ٹرائل پر حکم امتناع میں کل تک توسیع کر دی۔

اسلام آباد ہائیکورٹ کے جسٹس میاں گل حسن اورنگزیب اور جسٹس ثمن رفعت پر مشتمل 2 رکنی بنچ نے سائفر کیس میں چیئرمین پی ٹی آئی کی جیل ٹرائل اور جج تعیناتی کیخلاف انٹراکورٹ اپیل پر سماعت کی۔ عدالت نے ٹرائل کورٹ کی کارروائی روکنے کے حکم میں بھی ایک دن کی توسیع کر دی۔

عمران خان کے وکیل سلمان اکرم راجہ نے عدالت میں دلائل دیئے کہ 12 نومبر سے پہلے کے نوٹی فکیشن میں کابینہ سے منظوری نہیں لی گئی، وفاقی کابینہ کی منظوری سے پہلے ہونے والا ٹرائل خلاف قانون ہے۔

اسلام آباد ہائی کورٹ نے چیئرمین پی ٹی آئی کو سکیورٹی خدشات سے متعلق رپورٹ اور آفیشل سیکرٹ ایکٹ کی عدالت کے جج کی تعیناتی کا نوٹیفکیشن کل طلب کر لیا۔

عدالت نے ایڈیشنل اٹارنی جنرل کو ہدایت دیتے ہوئے کہا کہ آفیشل سیکرٹ ایکٹ عدالت نوٹیفائی کرنے کا نوٹیفکیشن کل پیش کر دیں، اٹارنی جنرل عدالت کو مطمئن کریں کہ جیل ٹرائل کیوں ضروری ہے۔

بعدازاں اسلام آباد ہائی کورٹ نے سائفر کیس کے جیل ٹرائل کے خلاف چیئرمین پی ٹی آئی کی انٹرا کورٹ اپیل پر سماعت کل 11 بجے تک ملتوی کر دی۔