موسمیاتی تبدیلیوں سے نمٹنے کیلئے وفاقی کابینہ کا اجلاس

آج(پیر)کو اسلام آباد میں پاکستان موسمیاتی تبدیلی کونسل کے دوسرے اجلاس کی صدارت کرتے ہوئے نگران وزیراعظم موسمیاتی تبدیلی کے مضر اثرات سے نمٹنے کے لئے قلیل، وسطی اور طویل مدتی فریم ورک تیار کرنے کی ہدایت کی ہے۔

انہوں نے کہا کہ پاکستان جیسے ترقی پذیر ملکوں کیلئے موسمیاتی تبدیلی قومی سلامتی کا ایک مسئلہ ہے۔

انہوں نے کہا کہ عالمی حدت بڑھانے میں پاکستان کا حصہ ایک فیصد سے بھی کم ہے لیکن یہ انتہائی متاثرہ ممالک میں سرفہرست ہے۔

گزشتہ سال موسمیاتی تبدیلی کے نتیجے میں آنے والے سیلابوں سے پاکستان کی ایک تہائی آبادی متاثر ہوئی تھی۔

انہوں نے کہا کہ ترقی پذیر ملکوں کو موسمیاتی تبدیلی کے درپیش خطرات سے بچانے کیلئے اقدامات اٹھانے کی ضرورت ہے۔

وزیراعظم نے کہا کہ رواں ماہ متحدہ عرب امارات میں ہونے والی کوپ ۔28 میں پاکستان اپنا کیس بھرپور طریقے سے پیش کرے گا۔

انہوں نے کہا کہ پاکستان عالمی برادری کے سامنے موسمیاتی تبدیلی سے متاثرہ ممالک کا کیس بھی موثر طور پر پیش کرے گا۔

وزیراعظم نے وزارت موسمیاتی تبدیلی کے زیرانتظام پاکستان کلائمیٹ چینج کونسل کے ماہرین پر مشتمل کمیٹی تشکیل دینے کی منظوری دیدی۔

وزیراعظم نے کہا کہ کمیٹی کو پاکستان میں کاربن کریڈٹ مارکیٹ کی تشکیل اور اس کی ٹریڈنگ کیلئے ایک جامع پالیسی تشکیل دینے اور اسے زیادہ پراثر بنانے کے حوالے سے کام کرنا چاہئے ۔