لاہور کے سیاستدان کا مسئلہ ہے کہ نہ کھیلیں گے نہ کھیلنے دیں گے،بلاول بھٹو

 پیپلزپارٹی کے چیئرمین بلاول بھٹو زرداری نے کہا کہ لاہور کے سیاستدان کا مسئلہ ہے کہ نہ کھیلیں گے نہ کھیلنے دیں گے، پرانے سیاستدان سیاسی کی بجائے ذاتی دشمنی پر اتر آئے ہیں۔ پرانی سیاست سے جان چھڑا کر نئی سیاست لانی ہو گی۔

اپردیر میں ورکرز کنونشن سے خطاب کرتے ہوئے چیئرمین پیپلزپارٹی بلاول بھٹو زرداری نے کہا کہ خیبرپختونخوا میں ہمارے کونشنز کا سلسلہ چل رہا تھا، ہم نے کنونشن ایبٹ آباد سے شروع کیا تھا، میں دیر کے عوام، بزرگوں کا شکریہ اور سلام پیش کرتا ہوں۔

چیئرمین پیپلزپارٹی نے کہا کہ پرانی سیاست سے جان چھڑا کر نئی سیاست لانا ہوگی، بزرگ سیاستدانوں نے ہر چیز کو اناء کا مسئلہ بنا رکھا ہے، پنجاب کے سیاستدانوں کی سیاست یہ ہے کہ کھیلیں گے نہ کھیلنے دیں گے، بزرگوں کی نفرت کی سیاست نقصان دہ ہے، تقسیم اور نفرت کی سیاست ختم کرنا ہوگی۔

بلاول بھٹو نے کہا کہ معلوم نہیں کہ بزرگ سیاستدانوں کے ارادے کیا ہیں؟ وہ خود کام کرتے ہیں نہ کسی اور کو کام کرنے دیتے ہیں، سیاسی جماعتوں کا ارادہ ہے کہ 18ویں ترمیم تبدیل کریں، وہ الیکشن جیتیں گے نہ انہیں دو تہائی اکثریت ملے گی، عوام نے مہنگائی لیگ کا اصل چہرہ بھی دیکھ لیا، عوام نے پی ٹی آئی کا اصل چہرہ بھی دیکھ لیا ہے۔

چیئرمین پی پی نے کہا کہ پیپلزپارٹی نے اسٹیبلشمنٹ کے بیان کا خیرمقدم کیا تھا، اسٹیبلشمنٹ نے کہا تھا اب ہم سیاست میں مداخلت نہیں کریں گے، ہمیں موقع ملا تو پاکستان کی قسمت بدل دیں گے، مزدور کارڈ کو ملک بھر میں متعارف کرائیں گے۔

بلاول بھٹو نے مزید کہا کہ دوسری جماعتوں کا مقصد حکومت میں آکر اپنا حساب پورا کرنا ہے، ن لیگ حکومت میں آکر اپنا ذاتی حساب لے گی، چیئرمین پی ٹی آئی آج کل جیل میں ہیں، نظر نہیں آرہا کہ چیئرمین پی ٹی آئی کو موقع ملے گا، خدانخواستہ اگر چیئرمین پی ٹی آئی کو موقع ملا تو وہ بھی ذاتی حساب لیں گے۔

چیئرمین پی پی نے مزید کہا کہ شیر تو بلی نکلا، اب آپ کو پیپلزپارٹی کو موقع دینا ہوگا، ان لوگوں کو گھر بٹھانا ہے جو دو دو بار وزیراعظم بن چکے ہیں۔