آئندہ ہفتے اچھی خبریں ملیں گی، اربوں کی سرمایہ کاری آئے گی، نگران وزیر اعظم

نگراں وزیراعظم انوار الحق کاکڑ کا کہنا ہے کہ آئندہ ہفتے اچھی خبریں ملیں گی، نہ صرف خطے بلکہ باہر سے بھی اربوں روپے کی سرمایہ کاری لائیں گے۔

ایک تقریب سے خطاب میں انوار الحق کاکڑ نے کہا کہ نگران حکومت نجکاری پر توجہ دے رہی ہے، ہم پاکستان انٹرنیشنل ائیر لائنز (پی آئی اے) کی نجکاری پر فوکس کیے ہوئے ہیں، یہ ہماری پہلی ترجیح ہے۔ اگر اداروں سے منافع نہیں کما سکتے تو ملک ترقی نہیں کر سکتا۔

انہوں نے کہا کہ اگلے 10 سال میں 10 لاکھ نرسز کو تربیت دینے کا پروگرام ہے، گزشتہ 5 سے 6 دہائیوں میں لوگ یورپ گئے اور وہیں سیٹل ہوگئے، البتہ انسانی وسائل کی ترقی کے لئے بھی کام جاری ہے۔ آئندہ ہفتے پاکستان میں سرمایہ کاری سے متعلق اچھی خبریں ملیں گی، ہم نا صرف خطے بلکہ بیرون دنیا سے بھی سرمایہ کاری لا رہے ہیں۔

انوار الحق کاکڑ نے کہا کہ ایس آئی ایف سی کے ذریعے سرمایہ کاری پالیسی میں اصلاحات کیے جا رہے ہیں جب کہ حکومتی اخراجات میں کمی کے لئے مختلف لائحہ عمل وضع کیے گئے ہیں۔ ہمیں ہنرمند اور ذہین لوگوں کی صلاحیتوں کو بروئے کار لانا ہوگا، پاکستان میں میڈیا آزاد اور خود مختار ہے، معاشرتی اقدار کے فروغ کے لئے میڈیا کا کردار اہم ہوتا ہے، دنیا معاملات کو سوشل میڈیا کے ذریعے آگے بڑھا رہی ہے۔

اسرائیلی جارحیت پر نگراں وزیراعظم نے کہا کہ غزہ کی صورتحال بہت تشویش ناک ہے، چین میں بیلٹ اینڈ روڈ انیشیٹو فورم (بی آر آئی) کے موقع پر مختلف سربراہان مملکت سے ملاقاتیں ہوئی تھیں۔