بشریٰ بی بی کا لطیف کھوسہ کے ساتھ آڈیو لیک کر نے کے خلاف عدالت سے رجوع

پاکستان تحریک انصاف (پی ٹی آئی) کے بانی چئیرمین عمران خان کی اہلیہ بشریٰ بی بی نے لطیف کھوسہ کے ساتھ کی گئی گفتگو کو ریکارڈ اور لیک کرنے کے خلاف عدالت میں درخواست دائر کردی۔ درخواست میں استدعا کی گئی کہ عدالت تمام جاسوسی آلات کو ہٹانے کے احکامات جاری کرے اور فون کال ریکارڈ کرنے اور پبلک کرنے سے روکا جائے۔

درخواست میں مؤقف اپنایا گیا کہ بشریٰ بی بی سابق وزیراعظم کی اہلیہ ہیں اور لطیف کھوسہ ان کے وکیل ہیں، دونوں کی آڈیو کال کو ریکارڈ کرکے عام کیا گیا اور پھر میڈیا پر اسے توڑ مروڑ کر پیش کیا گیا۔  سیکرٹری وزیراعظم، دفاع، داخلہ اور چیئرمین پی ٹی اے کہہ چکے ہیں کہ کسی بھی ایجنسی کو خفیہ ریکارڈنگ کی اجازت نہیں۔

درخواست میں یہ بھی کہا گیا کہ ایک وکیل اور مؤکل کے درمیان ہوئی گفتگو کو پبلک کرنے سے قانونی نظام درہم برہم ہو جائے گا۔عدالت اداروں اور ایجنسیوں کو فون کال ریکارڈ کرنے اور پبلک کرنے سے روکے اور اداروں اور ایجنسیوں کو تمام جاسوسی آلات کو ہٹانے کے احکامات جاری کرے۔

خیال رہے کہ گزشتہ دنوں سابق وزیر اعظم اور بانی پی ٹی آئی عمران خان کی اہلیہ بشریٰ بی بی اور بہنوں کے درمیان اختلافات سے متعلق ایک مبینہ آڈیو سامنے آئی تھی۔