چیئرمین سینیٹ کی سربراہی میں سینیٹرز پر مشتمل وفد عراق پہنچ گیا

چیئرمین سینیٹ محمد صادق سنجرانی کی سربراہی میں سینیٹرز پر مشتمل وفد عراق کے دارالحکومت بغداد پہنچ گیا ہے ۔ عراقی وزارت خارجہ کے انڈر سیکرٹری محمد حسین محمد بحرالعلوم اور عراقی پارلیمنٹ کے سینئر حکام نے وفد کا پرتپاک استقبال کیا۔

سینیٹ آف پاکستان کے وفد میں سینیٹرز دلاور خان ، محمد عبدالقادر اور فیصل سلیم رحمان شامل ہیں۔بدھ کو سینیٹ سیکرٹریٹ سے جاری بیان کے مطابق عراق میں قیام کے دوران چیئرمین سینیٹ محمد صادق سنجرانی عراقی پارلیمنٹ کے قائم مقام سپیکر سمیت اعلیٰ عراقی قیادت اور پارلیمانی سربراہان سے ملاقاتیں کریں گے۔ عراقی قیادت سے بات چیت میں سفارتی تعلقات کو مضبوط بنانے، اہم علاقائی مسائل پر تعاون کو فروغ دینے اور باہمی تعاون کی نئی راہیں تلاش کرنے پر توجہ دی جائے گی۔

سفارتی مصروفیات کے علاوہ چیئرمین سینیٹ عراق کے مختلف علاقوں میں واقع مقدس مقامات پر حاضری دینگے۔ یہ کثیر جہتی دورہ خطے میں امن، استحکام اور افہام و تفہیم کو فروغ دینے کے لیے پاکستان کے عزم کی نشاندہی کرتا ہے۔