نگران وزیر نجکاری فواد حسن فواد سے یو اے ای کے سفیر کی ملاقات

اسلام آباد میں متحدہ عرب امارات کے سفیر حماد عبید ابراہیم سالم الزعابی نے نگران وزیر نجکاری فواد حسن فواد سے ملاقات کی جس میں ریاستی اداروں کی جاری نجکاری اور مستقبل میں سرمایہ کاری کے مواقع پر تبادلہ خیال کیا گیا۔

واضح رہے کہ پاکستان کی نگراں حکومت نے ستمبر میں کہا تھا کہ 10 سرکاری کمپنیوں میں گورننس کو بہتر بنانےاور نجکاری کی کوششوں شروع کی گئی ہیں ۔ یہ قدم بین الاقوامی مالیاتی فنڈ آئی ایم ایف کے بیل آؤٹ کے تحت اصلاحات کے پروگرام کا حصہ بھی ہے۔

آئی ایم ایف کی جانب سے تین بلین ڈالر کے بیل آؤٹ پیکج کے تحت ریاستی ملکیتی اداروں، جن کے نقصانات حکومت کے لیے مالی بوجھ بنے ہوئے ہیں، کو بہتر گورننس، سرمایہ کاری اور نجکاری کے عمل سے گزارنے کا پروگرام ہے۔ ستمبر میں جاری کردہ وزارت خزانہ کے اعداد وشمار کے مطابق، 2020 تک، یہ سرکاری ادارے پانچ سو ارب روپے کے نقصان کا باعث بن چکے ہیں۔

نگران وزیر فواد حسن فواد نے اماراتی سفیر کو پاکستان میں جاری نجکاری کے عمل اور مستقبل قریب میں پیدا ہونے والے سرمایہ کاری کے مواقع سے آگاہ کیا جو سرمایہ کاری کے حوالے سے پرکشش منافع کا باعث بن سکتے ہیں۔ دونوں شخصیات نے باہمی دلچسپی اور تعاون کے مختلف امور پر تفصیلی بات چیت کی۔