چین وزیر خارجہ کا اپنے ایرانی ہم منصب سے ٹیلی فونک رابطہ

چین کے وزیر خارجہ وانگ یی نے اپنے ایرانی ہم منصب حسین امیر عبد اللہیان سے ٹیلی فونک رابطہ،غزہ کی صورتحال اور دو طرفہ تعلقات پر تبادلہ خیال کیا گیا

غیر ملکی خبر رساں ایجنسی کے مطابق وانگ یی نے کہا کہ فلسطین اسرائیل تنازع پر چین کا مؤقف جنگ بندی اور تنازعات کو جلد از جلد ختم کرنے، انسانی امداد کو یقینی بنانے اور دو ریاستی حل کی طرف واپسی ہے۔

ایرانی وزیر خارجہ امیر عبداللہیان نے اقوام متحدہ کی سلامتی کونسل کی صدارت کے دوران غزہ میں انسانی بنیادوں پر جنگ بندی کے لئے چین کی کوششوں کو سراہا۔ انہوں نے واضع کیا کہ ایران خواتین اور بچوں کے قتل کی مخالفت کرتا ہے اور غزہ میں فوری جنگ بندی اور انسانی ہمدردی کی بنیاد پر امداد کی فراہمی کے لئے راہداریوں کو کھولنے کا حامی ہے۔اقوام متحدہ کو مسئلہ فلسطین کے مستقبل کے حل میں اہم کردار ادا کرنا چاہیے۔

چینی وزیر خارجہ نے کہا کہ ان کے ملک کا موقف عرب ممالک کے موقف سے مطابقت رکھتا ہے اور اسلامی ممالک و عالمی برادری سے بہت زیادہ ہم آہنگ ہے۔انہوں نے کہا کہ دنیابھر کے ممالک کوغزہ کی صورتحال پر مضبوط آواز بلند کرنی چاہیے اور تنازعات پر زیادہ متحد موقف بنانا چاہیے۔

وانگ یی نے کہا کہ چین کا خیال ہے کہ فلسطین کے مستقبل سے متعلق کسی بھی انتظام کو فلسطینی عوام کی خواہشات کا مکمل عکاس ہونا چاہیے،فلسطینی عوام کے ریاستی اور خود ارادیت کے حق کا مکمل احترام کرنا چاہیے اور “فلسطین کی ملکیت، فلسطینی قیادت اور فلسطینیوں کے زیر انتظام کے اصول پر عمل پیرا ہونا چاہیے۔

انہوں نے اس موقع پرچین ک طرف سے ایران کے ساتھ مواصلات کو مضبوط بنانے، باہمی اعتماد کو مستحکم کرنے، تعاون کو وسعت دینے اور بین الاقوامی اور کثیر جہتی مواقع پر ایران کے ساتھ ہم آہنگی اور تعاون کو بڑھانے اور حقیقی کثیرالجہتی پر عمل کرنے ، دونوں ممالک اور ترقی پذیر ممالک کے جائز حقوق اور مفادات کے تحفظ کے ساتھ ساتھ بین الاقوامی مساوات اور انصاف کو فروغ دینے کے عزم کا اظہار کیا۔

انہوں نے کہا کہ چین ایران کے ساتھ اپنے تعلقات کو مسلسل بہتر بنانے، خطے کے ممالک کے اتحاد اور تعاون کو فروغ دینے اور علاقائی امن و سلامتی کے لئے ایران اور سعودی عرب کے باہمی تعلقات میں بہتری کی حمایت کرتا ہے۔امیر عبداللہیان نے ایران اور سعودی عرب کے درمیان ثالثی پر چین کا شکریہ ادا کرتے ہوئے کہا کہ ایران مختلف شعبوں میں چین کے ساتھ تعاون کو مضبوط بنانے اور باہمی تعلقات کو فروغ دینے کے لیے تیار ہے۔