کشمیر پر ہمارا موقف دو ٹوک ہے ، کوئی سودے بازی نہیں ہو گی: وزیرخارجہ

وزیر خارجہ شاہ محمود قریشی  نیویارک میں پاکستانی کمیونٹی کے اعزاز میں تقریب سے خطاب کرتے ہوئے  بھارت کو ایک بار پھر مذاکرات کی  پیشکش کرتےہوئے کہا کہ  پڑوسی کے ساتھ  امن کے ساتھ رہنا چاہتے ہیں  ۔ وزیر خارجہ  نے کہا ہے کہ عمران خان سوداگر نہیں، کشمیر کا سودا نہیں کرے گا۔ فلسطین اور کشمیر کے مسئلے میں گہری مماثلت ہے ، کشمیریوں کو بھی فلسطینیوں کی طرح کے مسائل کا سامنا ہے اورہم سب کے ساتھ اچھے تعلقات کے خواہاں ہیں ۔ ان کا کہنا تھا کہ مسئلہ فلسطین اور مسئلہ کشمیر کا حل تلاش نہ کیا گیا تو دیرپا امن دستیاب نہیں ہوگا۔

وزیرخارجہ نے  کہا کہ یہاں آنے کا مقصد جنرل اسمبلی کے اجلاس میں مظلوم فلسطینیوں پر جاری مظالم کی روک تھام کیلئے آواز اٹھانا تھا،اللہ کے فضل و کرم سے ہم سیز فائر کے اعلان کی صورت میں اپنے پہلے مقصد میں کامیاب ہوئے۔ انہوں نے کہا کہ فلسطین کی بگڑتی ہوئی صورتحال  کے پیش نظر او آئی سی کی ایگزیکٹو کمیٹی کے وزرائے خارجہ کا ہنگامی اجلاس منعقد ہوا۔اس اجلاس میں ہم نے او آئی سی کے پلیٹ فارم سے متفقہ لائحہ عمل طے کیا،ہم نے مشترکہ طور پر جنرل اسمبلی میں فلسطینیوں کے حق میں بھرپور آواز اٹھانے کا فیصلہ کیا۔ ہمیں دو طرفہ تعلقات کے فروغ کیلئے کلچرل ڈپلومیسی پر توجہ دینے کی ضرورت ہے ۔

وزیرخارجہ   شاہ محمود قریشی نے کہا  کہ  بیرون ملک مقیم پاکستانیوں کی فلاح و بہبود ہماری حکومت کی اولین ترجیحات میں شامل ہے، بیرون ملک مقیم پاکستانی کمیونٹی کا کردار قابلِ ستائش ہے، امریکن پاکستانی کمیونٹی ملک کی اقتصادی ترقی میں اہم کردار ادا کر رہی ہے  ،کرونا وبا کے دوران توقع کے برعکس زرمبادلہ کی شرح میں 47 فیصد ریکارڈ اضافہ ہوا  ۔ہم بیرون ملک مقیم پاکستانیوں کو ووٹ کا حق دلانے کیلئے کوشاں ہیں ۔ پاکستانی کمیونٹی کو یہاں سیاسی طور پر بھی متحرک کردار ادا کرنے کی ضرورت ہے، ہم بیرون ملک مقیم پاکستانیوں کو الیکشن میں حصہ لینے کا حق بھی دینا چاہتے ہیں ،ان اصلاحات کا مقصد آپ کو مزید بااختیار بنانا ہے۔

 پاکستانی کمیونٹی نے وزیر خارجہ کو نیویارک میں خوش آمدید کہتے ہوئے فلسطین کے مظلوم شہریوں کیلئے بھرپورکوششوں کو سراہا۔ پاکستانی کمیونٹی نے وزیر اعظم عمران خان اور وزیر خارجہ کو امن سفارتی مشن کی کامیابی پر مبارکباد دی۔

اس موقع پر یو این میں پاکستان کے مستقل مندوب منیر اکرم اور امریکہ میں پاکستان کے سفیر بھی اس موقع پر موجود تھے۔

علاوہ ازیں دورہ نیویارک میں وزیر خارجہ شاہ محمود قریشی  نے  امریکی ایوان نمائندگان کی ایشیاء کمیٹی کی قیادت سے نیویارک میں بذریعہ ویڈیو لنک ملاقات  کی ۔ شاہ محمود قریشی  کا کہنا تھا کہ امریکہ کے ساتھ وسیع البنیاد، سٹرٹیجک شراکت داری کے فروغ کے خواہاں ہیں، یہ شراکت داری دونوں ممالک کے دوطرفہ اور علاقائی پہلووں سے مشترکہ مفادات کے فروغ کا باعث ہوگی، وزیر خارجہ نے علاقائی روابط کے فروغ کے لئے دوطرفہ تجارت اور معاشی تعاون بڑھانے کی اہمیت پر زوردیا ۔

وزیرخارجہ شاہ محمو قریشی  نے افغانستان کے پرامن، سیاسی تصفیہ کے لئے پاکستان کی کوششوں کو اجاگر کیا،  ان کاکہنا تھا کہ افغانستان میں امن، تمام افغان فریقین اور کلیدی عالمی سٹیک ہولڈرز کی مشترکہ ذمہ داری ہے۔ اراکین کانگریس ایمی بیرا اور سٹیون شابٹ نے حالات سے آگاہی دینے پر وزیر خارجہ کا شکریہ ادا کیا ۔ کانگریس اراکین نے علاقائی امن اور سلامتی کے لئے پاکستان کی گراں قدر کاوشوں کوسراہا  ، اراکین کانگریس نے دونوں ممالک کے درمیان مضبوط تعلقات کے قیام میں پاکستانی امریکی کمیونٹی کے کردار کی بھی تعریف کی ۔