کورونا جے این ون ویریئنٹ کے ابھی تک صرف 15 کیسز رپورٹ ہوئے ہیں، نگران وزیر صحت

نگران وفاقی وزیر قومی وزارت صحت ڈاکٹر ندیم جان نے کہا ہے کہ کورونا جے این ون ویریئنٹ کے ابھی تک صرف 15 کیسز رپورٹ ہوئے ہیں، این آئی ایچ لیب نے 8، آغا خان یونیورسٹی نے 5 جبکہ ڈاؤ ہیلتھ یونیورسٹی کراچی نے 2 کیسز رپورٹ کیے ہیں۔

ڈاکٹر ندیم جان کا کہنا تھا کہ نئے ویریئنٹ سے عوام کو محفوظ رکھنے کیلیے تمام تر ضروری اقدامات کو یقینی بنایا جا رہا ہے، وفاق صوبوں کے ساتھ رابطے میں ہے۔ کورونا کا یہ ویرئنٹ ابھی تک دنیا میں 60 سے زائد ممالک میں رپورٹ ہوا ہے۔

انہوں نے مزید کہا کہ ڈبلیو ایچ او کے مطابق اس ویریئنٹ کے پھیلاؤ کا رسک بہت کم ہے۔ قومی ادارہ صحت نے وزیر صحت کی ہدایات پر موسمی معمول کے تحت کالی کھانسی کی روک تھام اور کنٹرول کے لیے ایک ایڈوائزری جاری کی ہے۔

نگران وزیر صحت نے کہا ہے کہ پاکستان میں اس مرض کے بڑے پیمانے پر پھیلنے کا امکان کم ہے۔ اس ایڈوائزری کا مقصد صحت کے اداروں کو احتیاطی اور کنٹرول کے اقدامات کے بارے میں آگاہ کرنا ہے۔ حفظان صحت کے سادہ طریقے بھی اس کے پھیلاؤ کو روکنے میں کلیدی کردار ادا کرتے ہیں۔