عوامی نیشنل پارٹی کا پنجاب میں استحکام پاکستان پارٹی کی حمایت کا اعلان

لاہور: عوامی نیشنل پارٹی (اے این پی) نے پنجاب میں استحکام پاکستان پارٹی (آئی پی پی) کے امیدواروں کی حمایت کا فیصلہ کیا ہے۔

عوامی نیشنل پارٹی پنجاب کے جنرل سیکرٹری امیر بہادر خان نے آئی پی پی کے صدر عبدالعلیم خان سے ملاقات کی اور اس موقع پر امیر بہادر نے کہا کہ وہ پنجاب بھر میں علیم خان اور ان کے پینل کی مکمل حمایت کریں گے۔

ہزارہ ویلفیئر ایسوسی ایشن کے چیئرمین بشیر احمد نے بھی عبدالعلیم خان سے ملاقات میں حمایت کا اعلان کیا۔ پاکستان تحریک انصاف (پی ٹی آئی) راوی ٹاؤن کے سابق صدر مبشر لال نے بھی آئی پی پی میں شمولیت کا اعلان کرتے ہوئے کہا کہ این اے 117 میں پی ٹی آئی کے تمام کارکنان عبدالعلیم خان کی انتخابی مہم چلائیں گے۔

عارف اعوان ایڈووکیٹ، نعیم گورائیہ ایڈووکیٹ نے وکلاء برادری کے ہمراہ عبدالعلیم خان سے ملاقات کی، این اے 117 سے وکلاء آئی پی پی صدر کا بھرپور ساتھ دیں گے۔

اس موقع پر امیدوار قومی اسمبلی عبدالعلیم خان نے کہا کہ میرا منشور عام آدمی کی خدمت اور بلا تفریق خدمت کو یقینی بنانا ہے، شاہدرہ اور نواحی علاقوں کو اپ گریڈ کرنا عام انتخابات میں ہماری اولین ترجیح ہو گی۔ انہوں نے عام انتخابات میں حمایت کرنے پر اے این پی اور ہزارہ برادری کا شکریہ ادا کیا ۔