الیکشن کمیشن نے حساس پولنگ اسٹیشنز کی تفصیلات جاری کر دیں

الیکشن کمیشن نے عام انتخابات 2024 کے لیے 50 فیصد پولنگ اسٹیشنز کو حساس یا انتہائی حساس قرار دیدیا۔

الیکشن کمیشن کی جانب سے حساس اور انتہائی حساس قرار دینے والے پولنگ اسٹیشنز کی کل تعداد 46 ہزار 65 ہے۔ ان پولنگ اسٹیشنز میں سے 27 ہزار 628 پولنگ اسٹیشنز کو حساس جبکہ 18 ہزار 437 پولنگ اسٹیشنز کو انتہائی حساس قرار دیا گیا ہے۔

پنجاب میں 12 ہزار 580 پولنگ اسٹیشنز حساس اور6 ہزار 40 انتہائی حساس قرار دیا گیا ہے جبکہ 32 ہزار 324 پولنگ اسٹیشز نارمل قرار دیئے گئے ہیں۔ سندھ کے 6 ہزار 545 پولنگ اسٹیشنز حساس ، 6 ہزار 524 انتہائی حساس جبکہ 5 ہزار 937 پولنگ اسٹیشنز نارمل قرار دیئے گئے ہیں۔

خیبر پختونخواہ کے 6 ہزار 166 پولنگ سٹیشنز حساس ، 4 ہزار 143 انتہائی حساس اور 5 ہزار 388 پولنگ سٹیشنز کو نارمل قرار دیا گیا ہے جبکہ بلوچستان میں کل 5ہزار 28 پولنگ اسٹیشنز میں سے صرف 961 نارمل قرار دیئے گئے ہیں۔ الیکشن کمیشن نے بلوچستان میں 2ہزار 337 پولنگ اسٹیشنز کو حساس جبکہ ایک ہزار 730 انتہائی حساس قرار دیا ہے۔

الیکشن کمیشن کے مطابق ملک بھر میں 90 ہزار 675 پولنگ اسٹیشنز بنائے گئے ہیں۔ ان میں سے انتہائی حساس پولنگ سٹیشنز پر سیکیورٹی کیلئے پاک فوج کے اہلکار تعینات کئے جائیں گے۔