بین المذاہب ہم آہنگی کا فروغ حکومت پاکستان کی اولین ترجیحات میں شامل ہے: مسعود خان

امریکہ میں پاکستان کے سفیر مسعود خان نے کہا ہے کہ بین المذاہب ہم آہنگی کا فروغ حکومت پاکستان کی اولین ترجیح ہے۔ اقلیتوں کے حقوق کا تحفظ نہ صرف پاکستان کے آئین اور قوانین میں شامل ہے بلکہ پاکستانی قوم اس مقصد کے لئے متحد اورپر عزم ہے۔

یہ بات انہوں نے امریکہ میں بین المذاہب ہم آہنگی کے حوالے سے کام کرنے والی معروف تنظیم آل نیبرز All Neighbors کے ڈائریکٹر الیاس مسیح اور تنظیم کے دیگر عہدہ داروں پر مشتمل وفد سے ملاقات کے دوران کہی۔

مسعود خان نے کہا کہ بین المذاہب ہم آہنگی اور مذہبی رواداری پاکستانی معاشرے کا وصف ہے جس کے تحفظ اور فروغ کے لئے اتفاق رائے پایا جاتا ہے۔

سفیر پاکستان نے کہا کہ جڑانوالہ کے واقعے کے بعد پاکستانی سیاسی ، مذہبی اور دیگر قیادت نے جس جذبے کااظہار کیا وہ بین المذاہب ہم آہنگی کے حوالے سے ہماری معاشرتی اقدار کی عکاسی کرتا ہے۔

انہوں نے کہا کہ جڑانوالہ واقعہ کے بعد جس طرح پاکستانی قوم نے اپنے مسیحی برادری سے اظہار یکجہتی کیا ہے دنیا بھر کی مسیحی برادری اس کو سراہتی ہے۔ انہوں نے متاثرہ چرچ اور پراپرٹی کی تعمیر نو کے حوالے سے حکومت پاکستان اور دیگر متعلقین کی کاوشوں کو بھی خصوصی طور پر سراہا۔