بانی چیئرمین پی ٹی آئی کے خلاف کیسز اور ٹرائل ڈرامہ ہے، بیرسٹر علی ظفر

پاکستان تحریک انصاف (پی ٹی آئی) کے وکیل بیرسٹر علی ظفر نے کہا ہے کہ بانی چیئرمین پی ٹی آئی عمران خان کے خلاف کیسز اور ٹرائیل ڈرامہ ہے جلد بازی میں فیصلہ دیا گیا، انصاف کا تقاضہ پورا نہیں کیا گیا۔

میڈیا سے گفتگو کرتے ہوئے بیرسٹر علی ظفر نے کہا کہ یہ کیسز ہیں نہ ٹرائل، یہ ڈرامہ ہے، بڑی جلدی تھی سزا دینے کی، آئین اور قانون کی خلاف ورزی ہوئی ہے، اس میں کوئی شک نہیں کہ یہ سزا جلد معطل ہو جائے گی۔  ٹرائل ہوا ہی نہیں،عمران خان کے وکلاء کو جرح کا موقع ہی نہیں دیا گیا۔ جب ٹرائل نہ ہو تو اسے مس ٹرائل کہتے ہیں۔

یہ کیسز ہیں نہ ٹرائل، یہ ڈرامہ ہے، بڑی جلدی تھی سزا دینے کی، آئین اور قانون کی خلاف ورزی ہوئی ہے، اس میں کوئی شک نہیں کہ یہ سزا جلد معطل ہو جائے گی،- @SyedAliZafar1 #ناانصافی_کا_بدلہ_ووٹ_سے
pic.twitter.com/YzP0Ore7sw

— PTI (@PTIofficial) January 31, 2024

بیرسٹر علی ظفر نے کہا کہ بانی پی ٹی آئی پر غیرقانونی کیسز ہیں اور سزا بھی غیرقانونی ہوئی ہے۔ گزشتہ روز بانی پی ٹی آئی اور وکلا نے کہا کہ 17 گواہوں سے جرح کی اجازت دی جائے۔ عدالت نے کہا کہ ہائی کورٹ جائیں پھر جرح کی اجازت ملے گی، آج ہائی کورٹ کی سماعت سے قبل ہی فیصلہ سنا دیا گیا، اگر جرح کرنے کی اجازت نہ دی جائے تو یہ مس ٹرائل ہوتا ہے۔

بیرسٹر علی ظفر نے کہا کہ امیدواروں کو لیول پلیئنگ نہ ملنے کے حوالے سے سپریم کورٹ میں درخواست دائر کریں گے، آزاد امیدواروں کو جو پی ٹی آئی جوائن کرنی ہے اس کے حوالے سے کیا قانونی چیزیں درکار ہیں اس پرکام ہو رہا ہے۔